Монгол Улсын Засгийн газар ирэх таван жилийн хөгжлийн үндсэн чиглэлээ олон нийтэд танилцуулж, Ерөнхий сайд Г.Занданшатар болон сайд нар мэдээлэл хийлээ. Зам, тээврийн сайд Б.Дэлгэрсайхан төмөр замын салбарын бодлого, зорилтын талаар тодруулга өгсөн юм. Түүний хэлснээр 2026-2030 онд дөрвөн боомтыг төмөр замаар холбохоор төлөвлөсөн бөгөөд Сэхээ-Шивээхүрэн, Ханги-Мандал, Бичигт-Зүүнхатавч чиглэлд нийт 2500 км төмөр зам тавих аж.
Мөн ирэх таван жилд хурдны төмөр замын төсөл хэрэгжүүлэх бодлого баримталж байгаа бөгөөд энэ нь 260 км/цаг хурдтай галт тэрэг зорчих стандартад нийцсэн төмөр зам байх юм. Тус төмөр замаар томоохон хотууд болон босоо тэнхлэгийн аймгуудыг холбож, хүн амын төвлөрлийг сааруулах зорилготой байна.
Багахангай-Хөшигийн хөндийн салаа төмөр замын бүтээн байгуулалт 2025 онд эхэлсэн бөгөөд өнөөдрийн байдлаар 82 км урт төмөр зам баригджээ. Ирэх хавар уг чиглэлийг Эмээлт эсвэл Рашаанттай холбохоор зураг төслийн ажлыг хийж байгаа бөгөөд ОХУ-ын талтай бүх шатанд зөвшилцөлд хүрээд байгаа гэж сайд онцолсон юм.
Мөн 2024 онд болсон Дүнжингаравын газын дэлбэрэлтээс хойш аюултай ачаа тээврийг хотын бүсээс гаргах зорилтыг Засгийн газар нэн тэргүүнд тавьж, төмөр замын хөгжлийг энэ чиглэлд чиглүүлж ажиллаж байна.

Эх сурвалж: Монгол Улсын Засгийн газар