Сирийн Ерөнхийлөгч Ахмед аль-Шараад тавьсан хориг арга хэмжээг цуцлах тухай АНУ-ын тогтоолыг НҮБ-ын Аюулгүйн Зөвлөл дэмжжээ. А.Шараа ирэх долоо хоногт Цагаан ордонд айлчлах юм.
А.Шараа 2024 оны 12 дугаар сард Башар аль-Асадыг түлхэн унагааж, 13 жилийн иргэний дайныг дуусгавар болгосон босогчдын дайралтыг удирдсан бөгөөд шилжилтийн Ерөнхийлөгчөөр томилогдсон билээ. АНУ-аас НҮБ-д суугаа Байнгын төлөөлөгч Майк Уолц хэлэхдээ, Б.Асадыг түлхэн унагаснаас хойш Сири улс “шинэ эрин үе”-д шилжин орсныг хүлээн зөвшөөрсөн “улс төрийн хүчтэй дохиог” НҮБ илгээлээ гэв.
А.Шараа өмнө нь “Аль-Каида”-тай холбоотой лалын шашинт “Хаят Тахрир аль-Шам” бүлэглэлийн /HTS/ удирдагч байсан тул НҮБ-ын хоригт өртөж байв. Америкийн эрх баригчид HTS-ийг долоодугаар сард гадаадын террорист бүлэглэлүүдийн жагсаалтаас хасжээ.
НҮБ мөн Сирийн Дотоод хэргийн сайд Анас Хаттабын эсрэг хориг арга хэмжээг цуцалсан байна. Хориг арга хэмжээнүүдийг цуцалсныг Сирийн Гадаад хэргийн сайд сайшааж, Сири болон Сирийн ард түмнийг дэмжиж байгаад АНУ болон найрсаг орнуудад талархал илэрхийлье хэмээн мэдэгджээ.
Сирийн удирдагч дайны хөлд нэрвэгдсэн улсад энх тайвныг тогтооход “бодитой ахиц дэвшил” гаргасан гэж АНУ-ын Ерөнхийлөгч Дональд Трамп мэдэгдсэний дараа А.Шараагийн айлчлал болох гэж байна. Хоёр удирдагч энэ оны тавдугаар сард Д.Трампыг Ойрх Дорнодод айлчлах үеэр Эр-Рияд хотод анх уулзсан юм. Уулзалтын дараа Д.Трамп А.Шарааг “маш хүчтэй өнгөрсөн түүхтэй хатуу чанга залуу” гэж тодорхойлж байлаа. Лалын шашинт HTS бүлэглэл 2016 онд харилцаагаа таслах хүртлээ Сири дэх “Аль-Каида”-гийн салбар байгууллага байжээ.
Ирэх даваа гаргийн айлчлал нь А.Шараагийн энэ онд АНУ-д хийсэн анхны айлчлал биш юм. Есдүгээр сард тэрбээр Нью-Йорк хотноо болсон НҮБ-ын Ерөнхий Ассамблейн чуулганд үг хэлсэн анхны Сирийн удирдагч болсон билээ. Тэрбээр хэлэхдээ, Сири улс “дэлхийн улс үндэстнүүдийн дунд өөрийн зүй ёсны байр сууриа эргүүлэн олж авч байна” хэмээгээд, Газын оршин суугчидтай эв санааны нэгдэлтэй байгаагаа илэрхийлжээ.
Эх сурвалж: BBC
