Япон улсад бүрэн дунд боловсролын шатанд үе тэнгийнхний дээрэлхэл дөрөв дэх жилдээ дараалан өсөж, 2024 онд түүхэн дээд үзүүлэлтэд хүрсэн талаар тус улсын Боловсрол, соёл, спорт, шинжлэх ухаан, технологийн яам мэдээллээ.

Тайланд дурдсанаар 2024 оны нэгдүгээр сараас 2025 оны гуравдугаар сарын хооронд нийт 770 мянга орчим дээрэлхэлтийн тохиолдол бүртгэгдсэн байна. Үүнээс хамгийн олон буюу 610 мянга орчим нь бага сургуульд, 135 мянга орчим нь дунд сургуульд, 18 мянга орчим нь ахлах сургуульд, харин 3 мянга гаруй нь тусгай хэрэгцээт боловсролын сургуульд гарчээ.

Үе тэнгийн дээрэлхлээс үүдэн сургуульд явахаас халшрах, хичээлээ урт хугацаагаар таслах тохиолдол ч нэмэгдсээр байгаа бөгөөд 2024 онд сургуулийн насны 354 мянган хүүхэд хичээлээ удаан хугацаагаар завсарласан байна. Сургуулийн орчин дахь дээрэлхэлтийн талаар багш нараас асуухад 61 хувь нь ийм тохиолдолд үйлдэгч болон хохирогч хүүхдийн гэр бүлд мэдэгддэг, 55.9 хувь нь дээрэлхэл үйлдсэн сурагчийг уучлал гуйхыг зааварладаг, харин 4.2 хувь нь асуудлыг сургуулийн захиргаанд шилжүүлдэг гэж хариулжээ.

Сүүлийн жилүүдэд дээрэлхэлтийн улмаас сурагчид амиа егүүтгэх сэдэлтэй болох, хичээл таслах тохиолдол мөн өсөж байна. Тухайлбал, энэ онд ийм шалтгаанаар хичээлдээ явахаа больсон хүүхдийн тоо 1400-д хүрсэн бөгөөд эдгээрийн 30 орчим хувь нь сургуулийн удирдлага, багш нар дээрэлхэлтийг цаг тухайд нь мэдээгүйгээс урьдчилан сэргийлж чадаагүй гэж дүгнэжээ.

Цахим орчин дахь үе тэнгийн дарамт, дээрэлхэл мөн нэмэгдэж буй нь сурагчдын сэтгэлзүйд хүчтэй нөлөөлж байгааг судалгаанд дурдсан байна. Японд хичээлийн шинэ жил хавар эхэлдэг бөгөөд энэ үед сурагчдын дундах амиа егүүтгэх зэрэг харамсалтай тохиолдол эрс өсдөг хандлагатай. Тэр дундаа өсвөр насны охид ийм үйлдлийн хохирогч болох нь хөвгүүдээс олон байдаг гэсэн судалгаа гарчээ.