Ассошиэйтед Пресс агентлагийн мэдээлснээр, Умард Солонгос өнөө өглөө “далай-газар” ангиллын далавчит пуужингийн туршилтаа амжилттай гүйцэтгэсэн тухай мэдэгджээ. Энэхүү үйлдэл нь АНУ-ын Ерөнхийлөгч Дональд Трамп Өмнөд Солонгост айлчилж буйтай давхцсан нь тус улсын цэргийн хүчин чадал өсөн нэмэгдэж байгааг харуулах зорилготой гэж шинжээчид үзэж байна.
Солонгосын төв цахилгаан мэдээний агентлагийн мэдээлснээр, туршилтын үеэр пуужингууд хоёр цаг орчим нисэж, байдаа оновчтой туссан байна. Тэдгээр нь цөмийн зэвсэгт хүчнийг өргөжүүлэх чухал зэвсэглэл болохыг онцолжээ.
Өмнөд Солонгосын Зэвсэгт хүчний нэгдсэн хорооноос мэдээлснээр, пуужингуудыг тус улсын баруун хойд нутгаас харваж, АНУ болон Өмнөд Солонгосын цэргийнхэн хамтран шинжилж байна. Мөн Умард Солонгосын өдөөн хатгалгад “шийдэмгий хариу” өгөх хамтарсан бэлэн байдлыг хадгалж буйг дурджээ.
Пуужингийн туршилт АНУ-ын Ерөнхийлөгч Дональд Трамп, Өмнөд Солонгосын Ерөнхийлөгч Ли Жэ Мён нарын Гёнжү хотод болох уулзалтаас хэдхэн цагийн өмнө явагдсан байна. Уг уулзалт нь Ази, Номхон далайн эдийн засгийн хамтын ажиллагааны байгууллагын (АПЕК) дээд хэмжээний уулзалтын хүрээнд зохион байгуулагдаж байгаа юм.
Туршилтыг цэргийн өндөр албан тушаалтан Пак Жон Чон удирдсан бөгөөд тэрбээр мөн шинээр үйлдвэрлэсэн мина зөөгч хоёр хөлөг онгоцны байлдааны бэлэн байдлыг шалгасан байна.
Д.Трамп айлчлалынхаа үеэр Ким Жөн Унтай уулзахад бэлэн гэдгээ илэрхийлсэн ч Өмнөд Солонгосын албаны хүмүүс уулзалт болох магадлал бага гэж үзэж байна.
Эх сурвалж: AP
Сэтгэгдэл (4)