Идэр голын сав газрын захиргаа, “Чулуут тул” төрийн бус байгууллагатай хамтран Завхан аймгийн Тосонцэнгэл УЦС-ын санхүүжилтээр цэнгэг усны индикатор болох зэвэг, хадран загасны 50 мянган ширхэг жарамгайг үржүүлж эхэллээ. Эхний ээлжийн 12 мянган жарамгайг Идэр голд нийлэх цутгал хэсэгт тавьсан бөгөөд энэ нь голын усны экосистемийг тэнцвэржүүлэх, усны чанарыг хамгаалах, цаашид загасны нөөцийг нөхөн сэргээх ач холбогдолтой гэж мэргэжилтнүүд онцолж байна.
Идэр гол нь Отгонтэнгэр уулын ар Өлзийт хайрханаас эх авч Завхан, Хөвсгөл аймгийн нутгаар урсан, 452 км урсгал зам туулан Дэлгэр мөрөнд цутгадаг Монгол орны хамгийн цэвэр ангиллын голуудын нэг юм. Тус голын Тосонцэнгэл сумын нутагт 2005 онд Герман Улсын санхүүжилтээр байгуулагдсан 375 кВт хүчин чадалтай усан цахилгаан станц ажилладаг бөгөөд станцын хиймэл нуур 8012 ам дөрвөлжин метр талбайг хамардаг.
Станц байгуулагдсанаар загасны нүүдэл, шилжилт хөдөлгөөнд саад үүссэн тул орон нутгийн иргэдийн санал, экологийн нөхцөл байдлыг үндэслэн загас үржүүлгийн энэхүү ажлыг хэрэгжүүлж эхэлсэн байна. Мөн загас дамжуулах хоолойг сайжруулах, усны экосистемийг тогтворжуулах чиглэлд цаашид хамтран ажиллахаар төлөвлөжээ.
Эх сурвалж: Идэр голын сав газрын захиргаа.
