Малайзын Куала-Лумпур хотод ням гарагт эхэлсэн Зүүн Өмнөд Азийн улсуудын холбооны (АСЕАН) 47 дахь дээд хэмжээний уулзалт гурван өдөр үргэлжилж, 1976 оноос хойш болоогүй хамгийн өргөн хүрээтэй саммит болсон байна. Уулзалтад АНУ-ын Ерөнхийлөгч Дональд Трамп, БНХАУ-ын Төрийн зөвлөлийн Ерөнхий сайд Ли Цян, Японы Ерөнхий сайд Санаэ Такаичи зэрэг дэлхийн томоохон гүрнүүдийн төлөөлөгчид оролцлоо.

Саммитын үеэр Хятад-АСЕАН, АСЕАН+3, Зүүн Азийн дээд хэмжээний уулзалт зэрэг олон чухал хуралдаанууд болж, бүс нутгийн эдийн засаг, уур амьсгалын өөрчлөлт, аюулгүй байдлын асуудлыг хэлэлцэв. “Оролцоо ба тогтвортой хөгжил” уриан дор болсон уг чуулга уулзалтаар Мьянмарын иргэний дайн, бүс нутгийн кибер луйврын сүлжээ, Газын зурвас болон Өмнөд Хятадын тэнгисийн нөхцөл байдал зэрэг олон сэдвийг хөнджээ.

Онцлох үйл явдал нь Зүүн Тимор улсыг АСЕАН-ы бүрэн эрхт гишүүнээр элсүүлэх ёслол байв. Ийнхүү тус холбоо 11 гишүүнтэй болж, “АСЕАН-ы 10” хэмээх нэр түүх болон үлдлээ. Мөн Камбож, Тайландын хооронд энхийн гэрээ байгуулж, АНУ-ын Ерөнхийлөгч Дональд Трамп болон Малайзын Ерөнхий сайд Анвар Ибрахим нар зуучилсан нь бүс нутгийн тогтвортой байдлын чухал алхам боллоо.

Хурлын үеэр Хятад, АНУ хоёр худалдааны маргаанаа зохицуулах талаар суурь тохиролцоонд хүрсэн нь дэлхийн эдийн засагт эерэг дохио өгч байна. Мөн “АСЕАН-ы алсын хараа–2045” үзэл баримтлал батлагдаж, бүс нутгийн эдийн засгийг 4 их наяд долларын хэмжээтэй болгох зорилт дэвшүүлжээ.

Хаалтын ёслолд АСЕАН-ыг даргалах эрхийг Малайзаас Филиппин улсад шилжүүлж, ирэх 2026 онд тус улс даргын үүргийг гүйцэтгэхээр болов.

Эх сурвалж: Yonhap, Reuters, CNA.