АНУ-ын Вашингтон хотноо болж буй Олон улсын байгаль хамгаалах бүлгийн хоёр жил тутмын түншлэл, хөрөнгө оруулалтын чуулганы үеэр Байгаль орчин, уур амьсгалын өөрчлөлтийн сайд Б.Батбаатар Дэлхийн банкны дэд ерөнхийлөгч Жүрген Фёгеле (Juergen Voegele)-тэй уулзжээ. Уулзалтын үеэр Дэлхийн банк Монгол Улсад 2026 онд зохион байгуулах Цөлжилттэй тэмцэх тухай НҮБ-ын конвенцын Талуудын 17 дугаар бага хурлын (“СОР17”) бэлтгэлийг бүх талаар дэмжиж, техникийн зөвлөх багийг дараа сард Улаанбаатарт ажиллуулахаа мэдэгдсэн байна.

Талууд “СОР17” хурлын бэлтгэл ажлын хамтын ажиллагааг гүнзгийрүүлэхийн зэрэгцээ байгаль орчин, уур амьсгалын өөрчлөлт, хөдөө аж ахуйн салбарын ногоон хөгжил зэрэг чиглэлээр үр дүнтэй хамтрах боломжийг хэлэлцсэн байна. Мөн хөрс, усны чанарыг сайжруулах, тогтвортой системийн аргачлалыг нутагшуулах, бодит шийдлийг ажил хэрэг болгоход анхаарахаа хоёр тал онцлон тэмдэглэжээ.

Эх сурвалж: Байгаль орчин, уур амьсгалын өөрчлөлтийн яам