DW-ийн мэдээлснээр, ОХУ-ын Ерөнхийлөгч Владимир Путин АНУ-тай байгуулсан плутонийг устгах тухай гэрээг хүчингүй болгосон зарлигт гарын үсэг зурж, хууль эрх зүйн мэдээллийн албан ёсны цахим хуудсанд нийтэлсэн байна.
Энэхүү гэрээний дагуу хоёр улс батлан хамгаалах зориулалтаар ашиглах шаардлагагүй 34 тонн плутонийг тус бүр устгах ёстой байсан юм. Гэрээг хүчингүй болгох тухай хуулийг ОХУ-ын Төрийн Дум аравдугаар сарын наймнд, Холбооны Зөвлөл хорин хоёрнд тус тус баталжээ. Үүнтэй зэрэгцэн гэрээний хамт хэрэгжиж байсан бүх протоколууд мөн хүчингүй болсон байна.
ОХУ, АНУ хоёр 2000 онд уг гэрээг байгуулж, Оросын тал 2011 онд соёрхон баталсан билээ. Хоёр тал плутонийг дахин боловсруулж, атомын цахилгаан станцын түлш болгон ашиглахаар төлөвлөсөн ч 2016 онд Орос гэрээний хэрэгжилтийг зогсоож, АНУ-ыг гэрээгээр хүлээсэн үүргээ зөрчсөн гэж буруутгажээ. АНУ плутонийн хаягдлыг дахин ашиглахын оронд булшлах шийдвэр гаргасан нь гол маргааны шалтгаан болсон юм.
Кремль гэрээг хүчингүй болгох шийдвэрээ “АНУ-ын найрсаг бус үйл ажиллагаа стратегийн тогтвортой байдалд аюул үүсгэж байна” гэж тайлбарлаж, Вашингтоноос хориг арга хэмжээг цуцлах, үүссэн хохирлыг барагдуулах, мөн 2000 оноос хойш НАТО-д элссэн орнуудад цэргийн оролцоогоо бууруулахыг шаардсан байна.
Плутонийг цөмийн зэвсэг үйлдвэрлэхэд ашигладаг стратегийн материал гэж үздэг.
Эх сурвалж: DW.
