Олон улсын хэл хуурчдын X их наадам энэ сарын хорин дөрөвнөөс хорин долоо хүртэлх өдрүүдэд Японы Хоккайдо мужийн Акан хотноо болж өнгөрлөө. Дэлхийн тавь гаруй орны шилдэг хэл хуурчид оролцсон тус наадамд улс бүрийн төлөөлөгчид өөрийн үндэсний хөгжмийн өв, уламжлалт урлагийг олон улсын тавцанд толилуулсан юм.

Монгол Улсаас Монгол угсаатан хэл хуурчдын холбооны есөн өвлөн уламжлагч оролцож, монгол хэл хуурын татлага, ая, уламжлалт урлагийн тоглолтоо үзүүлж, олон улсын шүүгчид болон дэлхийн шилдэг хуурчдаас өндөр үнэлгээ авсан байна. Энэ нь монгол хэл хуур, хөгжмийн өв соёлыг дэлхий дахинд сурталчлах чухал алхам боллоо гэж зохион байгуулагчид онцолжээ.

Наадмын үеэр XI их наадмыг Киргиз Улсад, XII их наадмыг Монгол Улсад зохион байгуулахаар шийдвэрлэж, Монгол угсаатан хэл хуурчдын холбооны ерөнхийлөгч Б.Нарандэлгэрыг Олон улсын хэл хуурчдын нийгэмлэгийн удирдах зөвлөлийн гишүүнээр томилсон байна.

Мөн тус холбооноос хэл хуурчдын II чуулганыг арван нэгдүгээр сарын арван нэгэнд зохион байгуулахаар төлөвлөжээ.

Эх сурвалж: Монгол угсаатан хэл хуурчдын холбоо