АНУ-ын ерөнхийлөгч Дональд Трамп Владимир Путинтэй Будапештад уулзахаар төлөвлөж байсан ч энэ уулзалтаа цуцалж, оросын томоохон нефтийн компаниудын эсрэг хориг арга хэмжээ авах шийдвэр гаргалаа. Трамп Цагаан ордонд НАТО-гийн ерөнхий нарийн бичгийн дарга Марк Рюттег хүлээн авах үеэр “Бид зорилтдоо хүрэхгүй гэж үзсэн, гэхдээ дараа нь уулзана” гэж мэдэгджээ. Тэр Путинтэй утсаар ярьсны дараа “ам ярианаас цаашгүй” гэж дүгнэсэн байна.
АНУ-ын Сангийн яам “Роснефть”, “Лукойл” болон тэдний охин компаниудын эсрэг хориг зарлаж, энэ нь “Орос энхийн үйл ажиллагаанд оролцох сонирхолгүй байгаатай холбоотой” гэж тайлбарлав. Сангийн сайд Скотт Бессент холбоотнуудаа оросын эсрэг хоригт нэгдэхийг уриалжээ.
Үүний зэрэгцээ Трамп “Томагавк” пуужинг Украины талд нийлүүлэхээс татгалзаж, “энэ пуужинг зөвхөн АНУ-ын цэргийнхэн ашиглах ёстой” гэж мэдэгдсэн байна. Уулзалт хойшлогдсон ч Унгарын ерөнхий сайд Виктор Орбан саммитын бэлтгэл үргэлжилж байгааг дурдсан юм.
НАТО, Европын холбоо, Украин хамтран гаргасан энхийн төлөвлөгөөнд Оросыг эзлэгдсэн нутаг дэвсгэрийг орхих, олзлогдсон хүмүүсийг солилцох, хохирлын нөхөн төлбөрийг хангахыг шаардсан байна. Гэвч Москва эдгээр нөхцлийг “ялагчдын тулгалт” хэмээн хүлээж авсангүй. Европын холбоо ч мөн Оросын эсрэг 17 дахь хоригийн багцыг баталж, 2027 оноос хийнээс бүрэн татгалзахаар болжээ.
Энэхүү алхам нь Оросын цэргийн бодлогод нөлөөлөхгүй гэж шинжээчид үзэж байна. Москва тавьсан зорилгоо өөрчлөхгүй бөгөөд Трампын шийдвэр Европт хамгийн түрүүнд эдийн засгийн цохилт өгөх магадлалтай гэж ажиглагчид дүгнэжээ.
Эх сурвалж: Iz.ru, РИА Новости, The Wall Street Journal, Bloomberg.
