Оросын газрын тосны хоёр том компани болох “Роснефть” болон “Лукойл”-д нэмж хориг арга хэмжээ авна гэдгээ АНУ-ын Ерөнхийлөгч Дональд Трампын засаг захиргаа лхагва гарагт зарлажээ.

Украины дайныг зогсоох асуудалд Оросын тал нухацтай хандахгүй байгаа учир хориг арга хэмжээ авч байгаагаа зарлаж байна гэж АНУ-ын Сангийн яам мэдэгдсэн байна. Дээрх компаниудыг хар жагсаалтад оруулах нь дайны машинаа санхүүжүүлэхийн тулд Оросын тал орлогоо нэмэгдүүлэх чадварыг бууруулах бөгөөд дайныг зогсоохын тулд АНУ “шаардлагатай тохиолдолд нэмэлт арга хэмжээ авахад” бэлэн байна гэж уг мэдэгдэлд дурджээ.

Сангийн сайд Скотт Бессент ийнхүү мэдэгдэхийнхээ өмнө “Fox News” сувагт ярилцлага өгөхдөө, энэ бол ОХУ-ын эсрэг авсан хамгийн том хориг арга хэмжээнүүдийн нэг болно гэсэн байна. “Ерөнхийлөгч Путин бидний найдаж байсан шиг шударга, илэн далангүй байдалтайгаар ширээний ард суусангүй” гэж С.Бессент хэлээд, Ерөнхийлөгч Д.Трамп “хоёр талын яриа хэлэлцээнд сэтгэл дундуур байгаа” гэдгийг нэмж хэлжээ.

Унгарт болох байсан Д.Трамп, В.Путин нарын уулзалтын бэлтгэл ажлыг зогсоосноос нэг хоногийн дараа АНУ хориг арга хэмжээ авахаа зарласан байна. Тодруулбал, “Роснефть”, “Лукойл” болон тэдгээрийн олон арван охин компанийн эсрэг нэмэлт хориг арга хэмжээ авчээ. Тус хоёр компани нь Москвагийн хөрөнгийн биржид бүртгэлтэй шилдэг 10 компанийн нэг бөгөөд Орост болон олон улсад газрын тос, байгалийн хийн хайгуул, олборлолт, боловсруулалт, борлуулалтын чиглэлээр үйл ажиллагаа явуулдаг.

Хориг арга хэмжээний хүрээнд Америк дахь эдгээр компани болон хувь хүмүүсийн бүх өмчийг царцаах бөгөөд Америкийн хувь хүн, аж ахуйн нэгжүүд тэдэнтэй бизнес хийхийг хориглоно. Өнгөрсөн долоо хоногт Оросын эсрэг шинэ хориг арга хэмжээ авсан Их Британийн Засгийн газрын мэдээлснээр, “Роснефть”, “Лукойл” нь нийлээд өдөрт 3.1 сая торх газрын тос экспортолж байна. “Роснефть” нь дэлхийн нийт газрын тосны 6 хувь, Оросын нийт газрын тосны тэн хагас орчмыг олборлодог.

Эх сурвалж: DW