АНУ-ын Ерөнхийлөгч Дональд Трамп, Австралийн Ерөнхий сайд Энтони Альбанезе нар газрын ховор элемент, чухал ашигт малтмалын нийлүүлэлтийг нэмэгдүүлэх тухай гэрээнд гарын үсэг зуржээ. 

Австралийн Ерөнхий сайд Энтони Альбанезегийн мэдэгдсэнээр, энэхүү гэрээ нь 8.5 тэрбум ам.долларын (6.3 тэрбум фунт стерлингийн) өртөг бүхий шууд хэрэгжүүлэхэд бэлэн төслүүдийг дэмжихийн сацуу ашигт малтмал олборлох болон боловсруулах улсын хүчин чадлыг өргөжүүлэх зорилготой ажээ. 

Суурь баримт бичгийн дагуу хоёр улс ирэх зургаан сарын хугацаанд АНУ, Австралийн хамтарсан төслүүдэд нэг тэрбум ам.долларын хөрөнгө оруулна.

Тус хоёр улс эдгээр асуудлаар Трампын эхний бүрэн эрхийн хугацаанаас хойш хамтран ажиллаж байгаа боловч Альбанезе хэлэхдээ, энэхүү шинэ гэрээ нь түншлэлийг “шинэ түвшинд” гаргана хэмээн онцолжээ. 

Энэхүү гэрээ нь мөн Америкийн хөрөнгө оруулалттайгаар Австралид боловсруулах хүчин чадал бий болгох зэрэг гурван төрлийн төслийн хөрөнгө оруулалтыг түргэсгэхэд чиглэж байгааг тэрбээр дурдсан байна. 

Хоёр улс мөн мөн үнэ тогтоох, зөвшөөрөл олгох, энэ салбар дахь компаниуд, төслүүдийн худалдаанд төрийн хяналт тавих асуудлаар хамтран ажиллахаар тохиролцжээ.

Цагаан ордны хэвлэлийн мэдээнд дурдсанаар, АНУ Баруун Австралид жилд 100 тонн бүтээгдэхүүн үйлдвэрлэх хүчин чадалтай орчин үеийн галийн үйлдвэр байгуулахад хөрөнгө оруулахаар төлөвлөжээ. Түүнчлэн стратегийн ач холбогдол бүхий ашигт малтмалын төслүүдийг дэмжих зорилгоор АНУ-ын Экспорт, импортын банкаар дамжуулан 2.2 тэрбум орчим ам.долларын санхүүжилт олгохоор бэлтгэж байна.

Австрали нь чухал ашигт малтмалын томоохон нийлүүлэгчдийн нэг боловч АНУ-тай адил үйлдвэрийн зориулалтаар боловсруулах тал дээр хамгийн том худалдааны түнш болох Хятадаас хамааралтай хэвээр байна.

Одоогоор Хятад улс дэлхийн газрын ховор металлын олборлолтын 70 орчим хувийг, боловсруулах үйлдвэрлэлийн 90 хувийг эзэлж байна.

Эх сурвалж: ВВС