Японы эрх баригч Либерал ардчилсан нам /ЛАН/ болон Инновацын нам эвсэл байгуулах гэрээг албан ёсоор байгууллаа. ЛАН-ын дарга Такаичи Санаэ намынх нь олон жилийн түншлэл гэнэт дуусгавар болсны дараа Японы ерөнхий сайд болоход хангалттай дэмжлэг авахыг хичээж байгаа юм. 

Т.Санаэ болон Инновацын намын дарга Ёшимүра Хирофүми нар даваа гаргийн орой уулзаж, албан ёсоор гэрээ байгуулжээ. Тэдний намууд эдийн засаг, төсөв, гадаад хэрэг, үндэсний аюулгүй байдал, эрчим хүч зэрэг бодлогын чиглэлээр хамтран ажиллахаар тохиролцсон байна.

“Өнөөдөр бол бидний хувьд Японы эдийн засгийг хүчирхэгжүүлэх, Япон улсыг ирээдүй хойч үеийнхээ өмнө хариуцлага хүлээх чадвартай орон болгон хувиргах эхлэл байх болно. Миний хувьд энэ тал дээр хамтран ажиллахыг тэсэн ядан хүлээж байна” гэж Т.Санаэ мэдэгджээ.

Харин Ё.Хирофүмигийн хувьд, “Бидний дэмжиж буй шинэчлэлүүдийг манай нам цаашид ахиулах болно. Бид Япон улсыг дэвжин дээшлүүлэх ижил зорилготой гэж бодож байна. Японыг хүүхдүүд өсөж том болох явцдаа үнэхээр агуу газар орон хэмээн боддог улс болгохын төлөө хамтран ажиллахыг хүсэж байна” гэж хэлсэн байна.

Хууль тогтоогчид мягмар гарагт шинэ ерөнхий сайдыг сонгох санал хураалт явуулахаар товлоод байгаа юм. Хэдийгээр ЛАН нь парламент дахь хамгийн том нам боловч сонгуулиар аль ч танхимд олонхын суудал авч чадаагүй билээ. Харин Инновацын намтай нэгдсэнээр олонх болоход ойртсон байна.

Энэ сарын эхээр эвслийн түнш Комэйто нам 26 жилийн дараа хамтын ажиллагаагаа зогсоосон юм. Энэхүү үйл явдал нь Т.Санаэ намын даргаар сонгогдсоноос хойш долоо хоног орчмын дараа болсон билээ.

Эх сурвалж: NHK