Украины Ерөнхийлөгч Владимир Зеленскийн АНУ-д хийсэн айлчлал өндөрлөлөө. Гэвч Вашингтонд болсон уулзалт Украины талд бодит дэмжлэг авчраагүй бөгөөд урьдчилсан зорилт биелсэнгүй гэж шинжээчид дүгнэж байна.
Зеленский АНУ-ын Ерөнхийлөгч Дональд Трамптай хэлэлцэх үеэр Украинд алсын тусгалын “Tomahawk” пуужин нийлүүлэх асуудлыг хөндсөн ч тохиролцоонд хүрсэнгүй. Америкийн тал уг зэвсгийг нийлүүлэх нь бүс нутгийн хурцадмал байдлыг нэмэгдүүлнэ гэж үзжээ.
Айлчлалын үеэр АНУ-ын талын зүгээс Украины төлөөлөгчдийг онцгой хүндэтгэлтэйгээр угтсангүй. Нисэх буудалд хүндэт харуул жагсахгүй, Цагаан ордонд хүлээн авалт зохион байгуулагдсангүй нь хэвлэл мэдээллийн анхаарлыг татав.
Хэлэлцээний үеэр Трамп Украинд цэргийн дэмжлэг нэмэгдүүлэхээс илүүтэйгээр Оросын Ерөнхийлөгч Владимир Путинтэй Будапештад зохион байгуулахаар төлөвлөж буй АНУ–Оросын саммитийн бэлтгэлийг гол сэдэв болгожээ. Энэ яриа Зеленскийд “тааламжгүй сюрприз” болсон хэмээн барууны хэвлэлүүд бичсэн байна.
АНУ-ын Ерөнхийлөгч уулзалтын дараа мэдэгдэл хийгээгүй бол Зеленский мөн хэвлэлд тайлбар өгөхөөс зайлсхийжээ. Цагаан ордон уг айлчлалыг “найрсаг, гэхдээ үр дүн багатай” гэж тодорхойлсон байна.
Будапештад удахгүй болох АНУ, Оросын дээд хэмжээний уулзалтад Европын орнуудын анхаарал төвлөрч байгаа бөгөөд шинжээчид уг уулзалт Украины асуудалд шинэ чиг баримжаа тодорхойлох эсэхийг ажиглаж байна.
Эх сурвалж: Reuters
