Бангладешийн Ерөнхий сайд асан Шейх Хасинад өнгөрсөн онд өөрийг нь засгийн эрхээс түлхэн унагаасан оюутнуудын тэргүүлсэн эсэргүүцлийн жагсаалыг хүч хэрэглэн дарсан гэх үндэслэлээр цаазын ял оноохыг прокурорууд шаарджээ. 

Энэтхэг рүү дүрвэсэн Ш.Хасина хүн төрөлхтний эсрэг гэмт хэрэг үйлдсэн хэргээр шүүгдэж байгаа юм. Тэрбээр аюулаас хамгаалах хүчнийхэн жагсагчдын эсрэг “үхэлд хүргэх зэвсэг хэрэглэхийг” тушаасныг нэгэн аудио бичлэг нотолжээ. Харин түүний хувьд өөрийг нь буруутгаж буйг няцааж байна. 

Ш.Хасинагийн 15 жилийн турш үргэлжилсэн засаглалыг эцэс болгосон үймээн самууны үеэр 1400 орчим хүн амиа алджээ. Энэ нь 1971 оны тусгаар тогтнолын дайнаас хойш Бангладешт үйлдэгдсэн хамгийн аймшигтай хүчирхийлэл байв.

Ерөнхий прокурор Тажул Ислам мэдэгдэхдээ, Ш.Хасинад 1400 удаа цаазаар авахуулах ял оноох ёстой хэмээгээд, гэхдээ энэ нь боломжгүй зүйл учраас бид ядаж нэг ийм ял оноохыг шаардаж байна гэлээ. “Ш.Хасинагийн зорилго бол өөрийнхөө болон гэр бүлийнхээ төлөө засгийн эрхээс буулгүй зууралдах явдал байсан. Харгис хэрцгий гэмт хэрэгтэн болж хувирсан тэрбээр үйлдсэн харгислалдаа гэмшиж харамсахгүй байна” гэж Т.Ислам пүрэв гарагт шүүх хурлын үеэр хэлжээ.

Бангладешт эсэргүүцлийн жагсаал 2024 оны долоодугаар сард эхэлсэн бөгөөд эхэндээ 1971 оны дайнд оролцсон хүмүүсийн төрөл төрөгсдөд төрийн албаны ажлын байрны квот олгохыг эсэргүүцэж байснаа удалгүй Ш.Хасинаг түлхэн унагах олон нийтийн хөдөлгөөн болж даамжирсан байна.

Хамгийн их цус урсгасан үйл явдал наймдугаар сарын 5-нд буюу Ш.Хасина нисдэг тэргээр зугтсан өдөр Дакка дахь түүний оршин суух газар руу олон хүн дайрч орохоос өмнө болсныг ВВС-гийн мөрдлөгийн явцад тогтоожээ. Тэр өдөр цагдаа нар хөл хөдөлгөөн ихтэй дүүрэгт 52 хүний ​​аминд хүрсэн нь Бангладешийн түүхэнд цагдаа нарын үйлдсэн хамгийн аймшигтай хүч хэрэглэсэн хэргүүдийн нэг юм.

Ш.Хасинад улсаас томилогдсон өмгөөлөгчийн хувьд, эсэргүүцэгчдийн хүчирхийллийн шинжтэй үйлдлийн хариуд цагдаа нар гал нээхээс өөр аргагүй байсан гэжээ. Ш.Хасинаг Дотоод хэргийн сайд асан Асадуззаман Хан Камал, Цагдаагийн газрын дарга асан Чоудхури Абдулла Аль-Мамун нартай хамт шүүж байгаа юм. Прокурорууд оргон зугтсан А.Камалд цаазаар авах ял оноохыг шаарджээ. Харин Ч.Аль-Мамун долоодугаар сард гэм буруугаа хүлээсэн ч ял аваагүй байна.

Ш.Хасина шүүхийг үл хүндэтгэсэн хэргээр зургаан сарын хорих ял сонсоод байгаа бөгөөд авлигын хэрэгт мөн буруутгагдаж байгаа юм. Бангладешт ирэх оны хоёрдугаар сард сонгууль болох бөгөөд Ш.Хасинагийн өрсөлдөгч нам болох BNP ялж магадгүй байна. Ш.Хасинагийн "Авами лиг" намын сонгуульд оролцох зэрэг бүх эрхийг хасжээ.

Эх сурвалж: BBC