ХАМАС бүлэглэлийнхний барьцаанд байгаа хүмүүсийг суллах тухай хэлэлцээрийг Израилын Засгийн газар баталсан талаар Ерөнхий сайд Биньямин Нетаньяхугийн ажлын албанаас өнөө өглөө мэдэгдлээ. 

Энэ бол гал зогсоох, Палестины хоригдлуудыг барьцааны хүмүүсээр солилцох тохиролцоог хэрэгжүүлэх гол алхам юм. Уг тохиролцоонд АНУ-ын Ерөнхийлөгч Дональд Трампын зуучлалаар хүрсэн билээ. Б.Нетаньяхугийн ажлын албанаас гаргасан товч мэдэгдэлд барьцааны хүмүүсийг суллах асуудалд голлон анхаарч, дайныг зогсоох Д.Трампын төлөвлөгөөний бусад хэсгийн талаар дурдаагүй байна.

Хэдийгээр олон асуултын хариу тодорхойгүй байсаар байгаа боловч талууд олон арван мянган палестинчуудын аминд хүрч, Газын зурвасын ихэнх хэсгийг сүйрүүлж, Ойрх Дорнодод өөр бусад зэвсэгт мөргөлдөөнийг өдөөсөн дайныг зогсооход сүүлийн саруудынхтай харьцуулахад улам илүү ойртож байгаа бололтой.

Газын зурваст байгаа барьцааны хүмүүсийг даваа эсвэл мягмар гарагт суллана гэж Д.Трамп мэдэгдсэн байна. Ерөнхийлөгч пүрэв гарагт Цагаан ордонд Засгийн газрынхаа гишүүдтэй уулзаж, гал зогсоох хэлэлцээр болон Ойрх Дорнодыг зорих төлөвлөгөөнийхөө талаар ярьжээ. Тэрбээр Газын зурвасаас барьцааны хүмүүсийг суллах нь төвөгтэй үйл явц боловч даваа эсвэл мягмар гарагт явагдана гэж хэлсэн байна.

Гэхдээ мөргөлдөөн цаашид хэрхэх талаар, тэр дундаа Д.Трампын шаардсанчлан ХАМАС-ыг зэвсэггүй болгох, дайны хөлд нэрвэгдсэн нутаг дэвсгэрийн засаглал зэрэг маргаантай асуудлуудаар талууд ямар нэгэн ахиц дэвшил гаргах эсэх нь одоогоор тодорхойгүй байна.

ХАМАС бүлэглэлийнхэн 2023 оны 10 дугаар сарын 7-нд Израил руу дайрснаар дайн эхэлсэн юм. Гэнэтийн дайралтын улмаас 1200 орчим хүн амиа алдсаны дийлэнх нь энгийн иргэд байсан бөгөөд 251 хүн барьцаалагдсан билээ. Үүний хариуд Израилын талаас явуулсан цэргийн ажиллагаа нь олон арван мянган палестинчуудын аминд хүрч, Газын зурвасыг сүйрүүлж, дэлхийн улс төрийг донсолгосон юм. Дайныг эсэргүүцсэн жагсаал дэлхий даяар өрнөж, Израилыг геноцид үйлдсэн хэмээн буруутгаж байгааг тус улсын эрх баригчид няцаасаар иржээ.

Эх сурвалж: AP