Афганистанд гар утаснаас нийгмийн томоохон сүлжээнүүдэд нэвтрэх боломж хязгаарлагдаад байна гэж олон улсын интернэт сүлжээний хяналтын “NetBlocks” байгууллага мэдээлжээ.

Тодруулбал, “Instagram”, “Facebook”, “Snapchat” зэрэг платформуудад нэвтрэхийг Афганистан дахь олон үйлчилгээ үзүүлэгч хязгаарлаж байгааг хэмжигдэхүүнүүд харуулж байна гэж тус байгууллага лхагва гарагт X хуудсандаа нийтэлсэн байна. Талибууд “TikTok”-т нэвтрэхийг 2022 онд хэдийн хориглосон юм.

Нийгмийн сүлжээний хэрэглэгчид даваа гаргийн оройноос гомдол мэдүүлж эхэлсэн гэж Афганистаны “Ariana News” телевиз мэдээлжээ. Зарим хэрэглэгч тодорхой сүлжээнүүдэд нэвтрэх боломжгүй болсон гэж хэлсэн бол зарим нь интернэтийн холболт удаашралтай эсвэл сүлжээ тасалдаж байгаа талаар ярьсан байна.

Нийслэл Кабул хотын нэгэн оршин суугч болон тус улсын хойд хэсэгт орших Мазари-и-Шариф хотын нэгэн оршин суугч Германы dpa мэдээллийн агентлагт мэдээлэхдээ, хувийн виртуал сүлжээ /VPN/ ашиглахгүйгээр “Instagram”, “Facebook”-т нэвтрэх боломжгүй болсон гэжээ. VPN нь хэрэглэгчдэд интернэтийн хязгаарлалтыг тойрч гарах боломжийг олгодог юм.

Гэхдээ “WhatsApp”, X зэрэг бусад нийгмийн сүлжээнүүд хэвийн ажиллаж байгаа гэж dpa мэдээлжээ. AFP агентлагийн мэдээлснээр, Афганистаны хэд хэдэн мужид тус агентлагийн сэтгүүлчид гар утсаараа нийгмийн сүлжээнд нэвтэрч чадахгүй байгаа гэнэ. Сэтгүүлчид мөн интернэтийн хурд мэдэгдэхүйц удааширсан гэж хэлсэн байна. 

Талибууд нийгмийн сүлжээний хязгаарлалтын талаар албан ёсоор мэдэгдэл хийгээгүй байна гэж хэд хэдэн мэдээллийн агентлаг мэдээлжээ. Дэлхийн үүрэн телефоны операторуудын холбоо болох “GSMA”-ийн мэдээлснээр, Афганистаны 44 сая хүн амын тал гаруй хувь нь /51 хувь/ гар утастай байна.

Талибууд есдүгээр сарын сүүлчээр интернэт болон харилцаа холбооны үйлчилгээг ойролцоогоор 48 цагийн турш бүрэн зогсоосон юм. Тодруулбал, есдүгээр сарын 29-нөөс 10 дугаар сарын 1 хүртэл ийм нөхцөл байдал үргэлжилсэн нь тус улсыг гадаад ертөнцөөс ерөнхийдөө бүхэлд нь тасалсан байна.

Интернэтийн хязгаарлалт нь ард иргэдэд, ялангуяа эмэгтэйчүүд, охидод маш ноцтой үр дагаврыг учруулж байна гэж хүний эрхийг хамгаалагч бүлгүүд шүүмжилж байлаа.

Эх сурвалж: DW