Монголд кино урлаг үүсэж хөгжсөний 90 жилийн ой тохиож буйтай холбогдуулан ойг тэмдэглэн өнгөрүүлэх Ажлын хэсгээс мэдээлэл хийв.

1935 оны аравдугаар сарын 11-ний өдөр Сайд нарын зөвлөлийн тогтоолоор Монгол Улсад кино бүтээх үйлдвэр байгуулах тухай зарлиг гарсан түүхтэй. Тиймээс Монголын кино урлагийн салбарын 90 жилийн ойд зориулсан үйл ажиллагааг  зохион байгуулахаар Соёл, спорт, аялал жуулчлал, залуучуудын яамнаас өнгөрсөн гуравдугаар сард Ажлын хэсэг гаргажээ. Хэсгийг Кино урлагийн зөвлөлийн дарга Ч.Ундрал ахалж, нийт зургаан гишүүнтэйгээр үйл ажиллагаагаа эхлүүлсэн байна.

Кино урлагийн салбарын ойн хүрээнд энэ сарын 29-нд Төрийн ордонд хүндэтгэлийн тоглолт зохион байгуулахаар болсныг мэдээлэв. Энэ талаар “Нэгүн” студийн захирал С.Ангараг ярихдаа “Ойн хүндэтгэлийн тоглолтод үе үеийн 800 гаруй уран бүтээлч оролцохоор төлөвлөсөн. Мөн 21 аймгийн кино урлагийн салбарын бүтээлчдийг төлөөлөл болгон оролцуулахаар бэлдэж байна. Хүндэтгэлийн тоглолт хоёр хэсэгтэй. Эхлээд Морин хуурын чуулга монгол киноны уран бүтээлээс толилуулна. Энэ үеэр тухайн уран бүтээлийн зохиомжит жүжгийг үзэгчдэд хүргэх юм. Түүнчлэн “Баянмонгол” чуулгынхан 1970-1980 оны орчимд гарч байсан киноны уран бүтээлээс сонирхуулна. Үүнээс гадна орчин цагийн буюу 2000 оноос хойш олонд хүрсэн киноны дуунуудыг хүргэнэ” гэв.

Монгол киноны өдрийг тохиолдуулан өнөөдөр Улаанбаатар хот болон 21 аймагт нэгэн зэрэг хуучны болон орчин цагийн дөрвөн киног үнэ төлбөргүй хүргэхээр төлөвлөжээ. Түүнчлэн постерын уралдаан зарлаж, 90 жилийн түүхийг эмхэтгэсэн ном гаргахын сацуу монгол киног бүртгэлжлүүлэх ажлыг эхлүүлсэн байна. 

Ташрамд дурдахад, Засгийн газрын 2025 оны есдүгээр сарын 24-ны 103 дугаар тогтоолоор жил бүрийн аравдугаар сарын 11-нийг “Үндэсний ино урлагийн өдөр” болгохоор тогтсон байна.