Чехийн парламентын сонгуульд экс Ерөнхий сайд Андрей Бабишийн тэргүүлдэг ANO нам бараг 35 хувийн саналаар ялалт байгуулжээ. Түүний ялалт нь зөвхөн тус улсын төдийгүй Европын төв болон зүүн хэсгийн улс төрийн чиг хандлагад чухал нөлөө үзүүлэх үйл явдал гэж ажиглагчид үзэж байна.
71 настай Андрей Бабиш 2017-2021 онд Чехийн Засгийн газрыг тэргүүлж байсан бөгөөд Европын холбооны татаасыг эрүүлжүүлэх төв барихад зориулан хууль бусаар ашигласан хэрэгт холбогдож, улмаар сонгуульд ялагдаж байв. Тэрээр уг хэргийг шүүхээр шийдвэрлүүлж, улмаар улс төрийн тавцанд дахин эргэн ирж байна.
Одоогоор Бабишийн хөрөнгийг 3.3 тэрбум ам.доллар гэж үнэлж байгаа бөгөөд тэр Чехийн хамгийн чинээлэг хүмүүсийн жагсаалтад долоодугаарт бичигддэг. Зарим хэвлэлүүд түүнийг Италийн экс Ерөнхий сайд, медиа магнат Сильвио Берлусконитой зүйрлэн “Бабискони” гэж нэрлэдэг.
Өөрийгөө “трампист” хэмээн тодорхойлдог Бабиш сонгуулийн кампанит ажлын үеэр төрийн “хэмнэлтийн дэглэм”-ийг зогсоох, Украинд үзүүлэх цэргийн тусламжийг бууруулах, мөн Украин Европын холбоонд элсэхэд бэлэн биш гэсэн байр сууриа илэрхийлсэн. Түүнийг Унгарын Ерөнхий сайд Виктор Орбантай үзэл бодлоороо ойр, оросын эрх баригчдыг дэмждэг гэх шүүмжлэл байдаг ч Бабиш өөрөө Оросын удирдлагуудтай харилцаагүй хэмээн мэдэгдсэн байна.
