Японы эрх баригч Либерал Ардчилсан намын (ЛАН) шинэ дарга Такаичи Санаэ намын гүйцэтгэх зөвлөлийн хурлаар удирдлагын шинэ бүрэлдэхүүнийг танилцууллаа. Тэрээр дэд даргаар Ерөнхий сайд асан, нам доторх нөлөө бүхий фракцийн удирдагч Асо Тарог томилсон бөгөөд түүнийг Такаичиг даргын сонгуульд ялалт байгуулахад гол дэмжигч байсан гэж үздэг.
Ерөнхий нарийн бичгийн даргаар Асо Тарогийн ойрын хамтрагч, Сангийн сайд асан Сүзүки Шюнъичи томилогдсон бол гүйцэтгэх зөвлөлийн даргаар Аримүра Харүко, сонгуулийн хорооны даргаар Фүрүя Кейжи ажиллахаар болжээ. Мөн эдийн засгийн аюулгүй байдлын сайд асан Кобаяши Такаюки улс төрийн зөвлөлийн даргаар томилогдсон нь намын дөрвөн том албан тушаалын нэгийг эзэлж байна.
Үүнээс гадна эдийн засаг, худалдаа, аж үйлдвэрийн сайд асан Кажияма Хироши парламенттай харилцах хорооны даргаар, Сүзүки Такако олон нийттэй харилцах албаны даргаар томилогджээ. Харин Ерөнхий нарийн бичгийн даргын орлогчийн үүргийг Абэ Шинзогийн фракцийн гишүүн асан Хагиуда Коичи гүйцэтгэхээр болсон байна.
Эх сурвалж: TASS.
