АНУ-ын Виржиниа мужийн холбооны шүүхийн тангарагтны шүүгчдийн зөвлөл тус улсын Холбооны мөрдөх товчооны (ФБР) хуучин дарга Жеймс Комиг Конгрессын өмнө худал мэдүүлэг өгсөн гэх хоёр хэрэгт буруутгалаа.

Комигийн хувьд 2020 оны есдүгээр сард Сенатын Шүүхийн хороо дээр гэрчлэл өгөхдөө Трамптай хийсэн ярианы талаар хэвлэлд мэдээлэл алдагдахад өөр хүнээр дамжуулан зөвшөөрөөгүй хэмээн мэдэгдсэн нь худал байсан гэж үзжээ. Түүнчлэн энэ мэдүүлгээр Конгрессын шалгалтыг саатуулахыг оролдсон гэх үндэслэлээр “шударга ёсыг саатуулсан” хэмээн яллаж байна.

Коми мэдэгдэлдээ өөрийгөө гэм буруугүй хэмээн мэдэгдэж, “шүүхийн тогтолцоонд итгэлтэй” гэж хэлсэн бол өмгөөлөгч нь шүүхийн танхимд үнэнийг тогтооно гэдгийг онцоллоо. Хэрэв гэм буруутай гэж үзвэл тэрээр тав хүртэлх жил хорих ял авах боломжтой.

Энэ хэрэг Трампын хоёр дахь бүрэн эрхийн хугацаанд улс төрийн өрсөлдөгчдийг нь мөрдөн шалгах ажиллагааны нэг хэсэг болж буй талаар ажиглагчид дүгнэж байна. Хуульчдын үзэж буйгаар Комигийн хэргийг нотлох нь хүнд бөгөөд түүний мэдүүлэг санаатай худал байсан эсэх нь гол асуудал болох аж.

Эх сурвалж: BBC News