Лондоны Хитроу зэрэг Европын хэд хэдэн томоохон нисэх онгоцны буудлуудын үйл ажиллагааг тасалдуулж, цахим халдлага үйлдсэн сэжигтнийг баривчилсан тухай Их Британийн Үндэсний гэмт хэрэгтэй тэмцэх агентлаг (NCA) лхагва гаригт мэдэгджээ.  

Сэжигтнийг 40 гаруй настай гэж таамаглаж байсан бөгөөд мягмар гаригийн орой Английн өмнөд хэсэгт баривчилсан байна. “Энэхүү баривчилгаа нь нааштай алхам хэдий ч уг хэрэгтэй холбоотой мөрдөн шалгах ажиллагаа эхний шатандаа үргэлжилж байна” гэж NCA-гийн дэд захирал Пол Фостер мэдэгджээ. Цахим гэмт хэрэг “дэлхий даяар байнгын аюул” болж, Их Британи болон бусад улс оронд "их хэмжээний хохирол учруулсаар" байна гэж тэрбээр нэмж дурдаад өөр дэлгэрэнгүй мэдээлэл өгөөгүй байна.

Есдүгээр сарын 19-ний орой Берлин, Брюссель, Дублин болон Лондоны Хитроу нисэх онгоцны буудлуудад зорчигчдыг бүртгэх системийн үйлчилгээ үзүүлдэг “Collins Aerospace” компани цахим халдлагад өртжээ. Тус компани нь мөн сансар судлалын техник, цэргийн зориулалттай систем хөгжүүлдэг байна. Одоогоор компаниас уг халдлагыг шалгаж байгаа гэж мэдэгджээ.

Программ хангамжид алдаа гарсны улмаас нисэх буудлуудын ажилтнууд ачаа тээшийг бүртгэх, буулгах ажлыг гар аргаар хийхээс өөр аргагүй болж, улмаар олон тооны нислэг саатах, цуцлагдахад хүргэжээ. Брюсселийн нисэх онгоцны буудлын удирдлагын мэдээлснээр, зорчигчдыг бүртгэх, онгоцонд суулгах системүүд мөн халдлагад өртсөн байна.

Сүүлийн жилүүдэд нисэх онгоцны буудлуудын системүүдэд цахим халдлага үйлдэх нь эрс нэмэгджээ.