АНУ-ын Холбооны нөөцийн систем (ХНС) 2025 оноос хойш анх удаа бодлогын хүүгээ 0,25 процентын пунктаар бууруулан 4–4,25 хувь болголоо. Энэ нь олон улсын шинжээчдийн хүлээлттэй нийцсэн шийдвэр байв. Хэдийгээр зарим эдийн засагчид хүүг 0,5 пунктээр бууруулахыг таамаглаж байсан ч ийм алхам хийх нь улс төрийн утга агуулгатай, Трампын ялалт мэт харагдах учир магадлал багатай гэж үзсэн байна.

ХНС-ийн тэргүүн Жером Пауэлл хөдөлмөрийн зах зээлийг “сонирхолтой тэнцвэрт” орж байгааг онцолжээ. Цагаачдын урсгал буурч, ажлын байрны эрэлт багасч байгаа нь ажилгүйдэл нэмэгдэхэд хүрсэн байна. Наймдугаар сарын байдлаар ажилгүйдлийн түвшин 4,2-оос 4,3 хувь болж өссөн нь үүний илрэл юм. Нью-Йоркийн Холбооны нөөцийн банкны судалгаагаар ажил олох боломжтой гэж найдаж буй иргэдийн хувь долоодугаар сарын 50,7-оос наймдугаар сард 44,9 хувь болж буурчээ.

Эдийн засагчид энэ удаагийн шийдвэрийг зөвхөн санхүүгийн нөхцөл байдлаар бус улс төрийн агуулгаараа онцлог гэж дүгнэж байна. Ерөнхийлөгч Трамп өмнө нь Пауэллыг удаа дараа шахан, бодлогын хүүг огцом буулгахыг шаардсан ч ХНС энэ удаа тусгаар байдлаа хадгалж чадлаа. Хэрэв хүүг 0,5 пунктээр бууруулсан бол энэ нь Трампын улс төрийн том ялалт гэж үнэлэгдэх байсан юм.

Өрхийн өрийн хэмжээ ч нэмэгдэж, 2025 оны хоёрдугаар улиралд 18,39 их наяд ам.долларт хүрсэн нь ХНС-ийн болгоомжлолыг нэмэгдүүлж байна. Тиймээс бодлогын хүүг дахин бууруулах боломж өндөр хэвээр гэж шинжээчид үзэж байгаа ч системийн хэмжээний эрсдэл одоогоор яригдах түвшинд хүрээгүй хэмээн дүгнэжээ.

Эх сурвалж: Vedomosti.ru, ТАСС