Баянхонгор аймгийн Хүрээмарал сумын нутагт энэ сарын 18-ны 00:23:09 цагт 3.5 магнитудын газар хөдлөлт бүртгэгдлээ. Тухайн газар нь аймгийн төвөөс 220 км, Улаанбаатар хотоос 830 км зайтай. Газар зүйн байршил (өргөрөг, уртраг): 46.61 98.27 бөгөөд Баянхонгор аймгийн Хүрээмарал сумын төвөөс хойд зүгт 21 км, Баянбулаг сумын төвөөс зүүн урд зүгт 26 км, Бууцагаан сумын төвөөс баруун хойд зүгт 57 км-т болсон талаар ШУА-ийн Одон орон, геофизикийн хүрээлэн мэдээлэв.

Баянхонгор аймгийн нутаг дэвсгэр нь газар хөдлөлтийн идэвхжил ихтэй бүсэд багтдаг. Одоо хүчин төгөлдөр мөрдөж байгаа "Газар хөдлөлтийн бүс нутагт барилга төлөвлөх, барилгын норм ба дүрэм"-д Баянхонгор аймгийн Баянлиг, Баянговь, Баян-Өндөр, Баянцагаан, Заг, Жаргалант сумын нутаг дэвсгэр газар хөдлөлтийн 9 баллын бүсэд, Баянхонгор, Өлзийт, Богд, Шинэжинст, Баян-Овоо, Бөмбөгөр, Баянбулаг, Гурванбулаг, Эрдэнэцогт сумын нутаг дэвсгэр 8 баллын бүсэд, Баацагаан, Галуут, Жинст, Бууцагаан, Хүрээмарал сум 7 баллын бүсэд хамаарна гэж нормчлон тогтоосон байдаг байна. Газар хөдлөлтийн голомт нь Алтайн салбар уулс, баруун хойноос зүүн урагш тогтсон Их Богдын нурууны газар хөдлөлтийн идэвхтэй хагарлын бүс нутагт багтдаг. Энэ бүсэд 1957 оны 12 дугаар сарын 4-нд 8-9 магнитутын 11-12 баллын хүчтэй газар хөдөлсөн тухай түүхэнд тэмдэглэгдэн үлджээ.

Дэлхийн гүн дэх чулуулаг агшилт, суналтад орох үед үүссэн энерги, тухайн чулуулаг тасарч эвдрэх үед хагарлын хавтгайн дагуу чөлөөлөгдөх үзэгдэлтэй холбоотойгоор газар хөдлөлт үүсдэг байна. Магнитуд гэдэг нь газар хөдлөлтийн төвд багажаар хэмжсэн үзүүлэлт бол, газрын хөрсөн дээр хүн болон барилга байгууламжид нөлөөлөх хүчийг баллаар хэмждэг. Газар хөдлөлтийн баллын хэмжээ 3-4 байвал хүнд мэдрэгдэх боломжтой, 6 баллаас хэтэрвэл барилга байгууламжид эвдрэл үүсэх магадлалтай, 10-аас хэтэрвэл барилга байгууламж нурах аюултай.