Японд өнөөдрийн байдлаар 65 ба түүнээс дээш настай 36 сая 160 мянган хүн амьдарч байгаа бөгөөд энэ нь жилийн өмнөхөөс 50 мянгаар буурсан үзүүлэлт болжээ. Энэ талаарх мэдээллийг тус улсын Дотоод хэрэг, харилцаа холбооны яам (ДХЯ) өчигдөр танилцуулсан байна.

Энэхүү тоо сүүлийн хоёр жилд анх удаа буурсан үзүүлэлттэй гарч байгаа нь ахмад настнуудад зориулсан хүндэтгэлийн өдрийн босгон дээр зарлагдсан юм. Гэхдээ нийт хүн амд эзлэх хувийн хэмжээгээр ахмад настнуудын хувь 0,1%-иар өсч, түүхэн дээд буюу 29,4%-д хүрсэн байна.

Японы ДХЯ-ны мэдээллээр 65 ба түүнээс дээш настнуудын нас баралт шинээр 65 нас хүрч байгаа ахмад настнуудын тооноос давсан нь нийт тоо буурахад нөлөөлсөн гол хүчин зүйл болжээ. Мөн энэ насны ахмад хүмүүсийн 26,2% нь эрэгтэй, 20,5% нь эмэгтэйчүүд байна. Японы нийт эмэгтэй хүн амын 32,4% нь өндөр настнууд болсныг судалгаагаар тогтоожээ.

Японы Хүн ам, нийгмийн аюулгүй байдлын үндэсний хүрээлэнгийн таамаглалаар 2040 он гэхэд ахмад настнуудын нийт хүн амд эзлэх хувь 34,8%-д хүрэх төлөвтэй байна. Мөн өнөөдөр 65 ба түүнээс дээш насны ахмад настнуудын 9,3% нь ажил хөдөлмөр эрхэлж байгаа бөгөөд энэ үзүүлэлт 21 дэх жилдээ дараалан өссөн нь аж. Өөрөөр хэлбэл, Японд ажил хөдөлмөр эрхэлж байгаа 7 хүн тутмын нэг нь ахмад настан болж байна.

Энэ байдалтай холбоотойгоор өнгөрсөн тавдугаар сард Японы Хөдөлмөр, эрүүл мэндийн хуулийн нэмэлт заалтад ахмад ажилтнуудын ажлын нөхцлийг сайжруулах чиглэл оруулсан юм. Учир нь нас ахихын хэрээр ажлын байранд осол гэмтлийн эрсдэл нэмэгддэг учир компаниудын анхаарал шаардлагатай байдаг аж.

Мөн 40 саяас дээш хүн амтай улс орнуудын дунд 65 ба түүнээс дээш настнуудын хүн амд эзлэх хувь хамгийн өндөрт Япон улс оржээ. Дараагийн байрт Итали (25,1%), Германд (23,7%) тус тус жагсаж байна. Түүнчлэн Японы 75 ба түүнээс дээш настнуудын хувь 17,2% бөгөөд энэ нь бусад ижил төстэй улс орнуудтай харьцуулахад илт өндөр үзүүлэлт юм.