Сагсан бөмбөгийн Европын аварга шалгаруулах тэмцээний финалын тоглолтод Германы шигшээ баг Туркийн багийг 88:83 /24:22, 16:24, 26:21, 22:16/ харьцаагаар буулган авснаар тивийн аваргаар шалгарлаа.  

Өчигдөр Рига хотод болсон тоглолтод Германы багаас хамгийн олон буюу 20 оноог довтлогч Исаак Бонга, Туркийн багаас төвийн тоглогч Альперен Шенгюн 28 оноо тус тус авчээ. Мөн Германы багийн Деннис Шрёдер 16 оноо авч, 12 оновчтой дамжуулалтаар дабл-дабл хийлээ.

Ингэснээр германчууд хоёр дахь удаагаа Европын аварга болж байна. Өмнө нь тэд 1993 онд аваргалж, 2005 онд мөнгөн медаль, 2022 онд хүрэл медаль хүртэж байжээ. Мөн дэлхийн аваргыг хамгийн сүүлд хүртсэн баг бол Германы шигшээ юм.

Харин Туркийн сагсан бөмбөгчид ЕАШТ-ий мөнгөн медалийг хоёр дахь удаагаа хүртлээ. Тэд 2001 онд талбайдаа ийм амжилт үзүүлсэн юм.  

Хүрэл медалийн төлөөх тоглолтод Грекийн шигшээ баг Финландын багийг 92:89 харьцаагаар хожлоо.

Энэ удаагийн ЕАШТ-ийг Кипр, Финланд, Польш, Латви улсуудад зэрэг зохион байгуулжээ.

ОХУ-ын шигшээ баг хамгийн сүүлд 2007 онд Европын аварга болж байсан бөгөөд 2022 оноос хойш олон улсын тэмцээнүүдэд оролцохгүй байгаа юм. Хуучин нэрээр ЗХУ-ын сагсан бөмбөгчид Европын аваргаар 14 удаа шалгарч байжээ.