9-р сарын 12-ноос 13-нд шилжих шөнө Увс, Завхан, Архангай, Хөвсгөл аймгийн нутгаар, Архангайн хойд талын сумдууд, Булган аймгийн ихэнх сум, Төв аймгийн баруун сумд, Сэлэнгийн зарим сумдаар бороо орох төлөвтэй байна. 13-ны өдөр төвийн аймгуудын ихэнх нутаг, зүүн аймгуудын ихэнх нутаг, говийн бүс нутгийн хойд талын сумдаар бороо үргэлжилж салхины хурд ширүүсч эрс сэрүүснэ. Энэ процесс зүүн тийшээ шилжин үргэлжлэх бөгөөд зүүн аймгуудын нутгийн зүүн талын сумд өдрийн турш бороо орох төлөвтэй байгаа ч 15-наас 16-нд шилжих шөнө баруун аймгуудаас эхлэн агаарын байдал дахин тогтворгүй болж нойтон цас орох магадлалтай байна.

Агаарын температурын хувьд 9-р сарын 12-ноос 16-ны өдрүүдэд томоохон уулархаг нутаг, гол мөрний сав газруудаар шөнөдөө 3-8 градус хүйтэн, өдөртөө 4-9 градус дулаан, говийн бүс нутгийн өмнөд хэсгээр шөнөдөө 4-9 градус дулаан, өдөртөө 13-18 градус дулаан, бусад нутгаар шөнөдөө 2 градус хүйтнээс 3 градус дулаан, өдөртөө 10-15 градус дулаан байна. 9-р сарын 15-наас 16-нд шилжих шөнө хангай, уулархаг нутгаар сэрүүн, хүйтэрч хонох төлөвтэй байна.

Иймд ил задгай байгаа хүнсний ногоо, хадлан зэргийг хамгаалах шаардлагатай ба бороо, нойтон цас орох тул зам даваанд халтиргаа гулгаа үүсэх магадлалтайг иргэд болон тээвэрчид та бүхэнд ЦУОШГ-аас анхааруулж байна. Тариаланчид цаг агаарын нөхцөл байдалтай уялдуулан ажлаа төлөвлөх, ногоо, тариагаа хамгаалах арга хэмжээг авах нь зүйтэй.