Цагаачлалтай тэмцэх ажиллагааны хүрээнд “Hyundai Motor” компанийн барилгын талбайгаас 475 ажилчин баривчлагдсаны дараа Өмнөд Солонгос, АНУ-ын талууд солонгосчуудад зориулсан визийн шинэ ангилал бий болгох асуудлыг хэлэлцэнэ гэж Гадаад хэргийн сайд Чо Хён мэдэгджээ. 

АНУ-ын Төрийн нарийн бичгийн дарга Марко Рубиотой лхагва гарагт уулзсаныхаа дараа Чо Хён мэдэгдэхдээ, Өмнөд Солонгосын иргэд АНУ-д дахин нэвтрэх үед тэдэнд ямар нэгэн дарамт үзүүлэхгүй гэсэн баталгааг авсан хэмээн хэлснийг “Yonhap” агентлаг уламжилсан байна.

Өнгөрсөн долоо хоногт Америкийн цагаачлалын албаныхан Жоржиа муж улс дахь цахилгаан авто машины цэнэг хураагуурын үйлдвэрт ажиллаж байсан Өмнөд Солонгосын 300 орчим иргэнийг саатуулсны дараа Чо Хён үүссэн асуудлыг шийдвэрлэхээр Вашингтоныг зорьсон юм.

Тэдгээр ажилчдыг тээвэрлэсэн тусгай үүргийн онгоц пүрэв гарагт АНУ-аас хөөрөх бөгөөд тэднийг цагдан хорих төвөөс нисэх онгоцны буудалд авчрахдаа гарыг нь гавлахгүй гэж “Yonhap” агентлаг мэдээлсэн байна. АНУ-ын цагаачлалын албаныхан цагаачдыг албадан гаргахдаа гарыг нь гавладаг ажээ.

АНУ-ын Дотоодын аюулгүй байдлын яам болон Төрийн департаментаас дээрх мэдээллийг талаар одоогоор ямар нэгэн тайлбар хийгээгүй байна.

“АНУ-ын аж үйлдвэрийн салбарыг сэргээхэд хувь нэмрээ оруулахын тулд технологи, ноу-хаугаа өгөхөөр Америкт ирсэн ажилчдыг Трампын засаг захиргаа баривчилсан явдалд солонгосчууд гомдож, цочирдсон гэж Чо Хён М.Рубиод хандан хэлсэн ажээ.

Ур чадвартай гадаадын ажилчдад олгодог Америкийн визийг авахад тавьдаг хатуу хязгаарлалтын талаар Солонгосын бизнес эрхлэгчид гомдоллосоор ирсэн бөгөөд энэ нь үйлдвэр барих ажлыг хянах, дотоодын ажилчдыг сургахад хүндрэл учруулж байгааг дурддаг.