Барууны орнууд мөргөлдөөнийг зогсоохын тулд Украинд аюулгүй байдлын баталгаа олгох талаар хэлэлцсээр байна. Тэгвэл ОХУ-ын Ерөнхийлөгч Владимир Путин улс орных нь аюулгүй байдлыг мөн адил хүндэтгэх ёстой гэж мэдэгджээ. 

В.Путин мягмар гарагт Бээжин хотноо Словакийн Ерөнхий сайд Роберт Фицотой уулзах үеэрээ ийнхүү мэдэгдсэн байна.

Оросын удирдагч хэлэхдээ, “Украин өөрийн аюулгүй байдлыг хэрхэн хангах нь мэдээжийн хэрэг өөрсдийнх нь шийдвэр. Гэхдээ Европын аюулгүй байдлыг багтаасан суурь баримт бичигт дурдсанчлан аль нэг орны аюулгүй байдлыг хангахын тулд бусад улс орны аюулгүй байдал, ялангуяа Оросын аюулгүй байдалд хохирол учруулж болохгүй” гэлээ.

Украиныг Европын Холбоонд гишүүнээр элсүүлэхийг миний бие хэзээ ч эсэргүүцэж байгаагүй, харин НАТО-гийн тухайд “энэ бол өөр асуудал юм” гэж В.Путин мөн цохон тэмдэглэжээ.

Саяхан Украинд “Рейтинг групп” хэмээх бие даасан судалгааны байгууллагаас судалгаа явуулахад, судалгаанд оролцогчдын 75 хувь нь АНУ болон Европ аюулгүй байдлын баталгаа гаргаж өгсөн тохиолдолд гал зогсоох хэлэлцээрийг дэмжинэ гэж хариулсан байна. Харин санал асуулгад оролцогчдын ердөө 3 хувь нь нөхцөл болзолгүйгээр гал зогсоохыг дэмжиж байгаагаа илэрхийлжээ.

Украины тал цэргийн хүчин чадлаа нэмэгдүүлсээр байна. Тус улс наймдугаар сард байлдааны талбарт “Фламинго” нэртэй шинэ далавчит пуужинг нэвтрүүлжээ. Ерөнхийлөгч Владимир Зеленский мэдэгдэхдээ, энэ бол манай улсын зэвсэглэлд байгаа “хамгийн амжилттай” пуужин гэжээ. Уг пуужин нь 3000 орчим км-ийн тусгалтай байна. Украины цэргийн хэвлэл болох “Милитарный”-д мэдээлснээр, уг зэвсгийг Крым дэх Оросын бааз руу довтлоход ашиглажээ. 

Эх сурвалж: NHK