АНУ-ын Засгийн газар гадаадын оюутнууд болон сэтгүүлчдийн оршин суух хугацааг багасгах санал дэвшүүлээд байна. Энэхүү арга хэмжээ нь хууль бус цагаачлалтай тэмцэх зорилготой өргөн хүрээний бодлогын нэг хэсэг хэмээн Ерөнхийлөгч Дональд Трампын засаг захиргаа онцолжээ.
Дотоодын аюулгүй байдлын яамнаас F ангиллын буюу гадаад оюутны виз, J ангиллын буюу солилцооны хөтөлбөрт хамрагдагчдын виз, I ангиллын буюу хэвлэл мэдээллийн ажилтны визийн журамд өөрчлөлт оруулах хувилбарыг судалж байгаа аж. Хэрэв журамд өөрчлөлт орвол оюутнууд болон солилцооны визтэй иргэд АНУ-д хамгийн ихдээ дөрвөн жил байх эрхтэй болох бол сэтгүүлчид 240 хоног оршин суух зөвшөөрөл авах юм. Харин Хятадын сэтгүүлчдэд ердөө 90 хоногийн эрх олгохоор тусгажээ.
Албан мэдээллээр 2024 онд АНУ-д F ангиллын визтэй 1.6 сая оюутан, 355 мянган солилцооны хөтөлбөрийн оролцогч, мөн 13 мянган сэтгүүлч оршин сууж байсан байна. Шинэ журам хэрэгжсэнээр виз эзэмшигчдийг илүү нарийн хянах боломж бүрдэхийг эрх баригчид онцолсон юм.
Энэхүү санал нь Трампын бүрэн эрхийн эхний хугацаанд дэвшүүлж байсан бодлоготой ижил бөгөөд олон нийтэд 30 хоногийн хугацаанд хэлэлцүүлэгт оруулах эрх нээлттэй байна. Үүнээс гадна АНУ саяхан ачааны автомашины жолооч нарт виз олгохыг зогсоосноо мэдэгдсэн билээ.
Эх сурвалж: Kazinform
