НАТО-гийн 32 гишүүн орон энэ онд батлан хамгаалахын зардлаа ДНБ-ий хоёр хувьд хүргэх зорилтыг хангах төлөвтэй байна. Гэвч холбоо цаашид илүү амбицтай зорилт тавьж, АНУ-ын Ерөнхийлөгч Дональд Трампын шахалтаар ирэх 10 жилд батлан хамгаалахын зардлаа үлэмж хэмжээгээр өсгөхөөр тохиролцжээ.
Трамп холбоотнуудаасаа ДНБ-ий таван хувийг аюулгүй байдалд зориулахыг шаардаж, үүнийг НАТО-той харилцаагаа үргэлжлүүлэх гол нөхцөл гэж үзсэн байна. Үүнд батлан хамгаалахын үндсэн зардалд 3.5 хувь, дэд бүтэц, кибер аюулгүй байдал зэрэг салбарт 1.5 хувийг зарцуулах шаардлага тавигдсан юм.
Одоогоор НАТО-гийн мэдэгдлээр бүх холбоотон улс 2025 онд хоёр хувийн зорилтод хүрэх төлөвтэй бөгөөд эвслийн нийт батлан хамгаалахын зардал 1.5 их наяд ам.доллараас давна. Испани, Бельги, Итали зэрэг орнууд энэ төлөвлөгөөгөө аль хэдийн зарласан бол Польш, Балтийн орнууд ойрын жилүүдэд зардлаа таван хувьд хүргэхээр ажиллаж байна. Тухайлбал, Польш 2025 онд ДНБ-ийхээ 4.48 хувийг батлан хамгаалахад зарцуулахаар төлөвлөжээ.
Европын аюулгүй байдлын баталгаа болж ирсэн АНУ цаашид Европын орнуудад илүү их үүрэг хариуцлага хүлээлгэхийг зорьж байна. Пентагон Хятадад илүү төвлөрөхийн тулд Европ дахь оролцоогоо бууруулах магадлалтайг ч сэрэмжлүүлжээ. Барууны тагнуулын байгууллагууд Украины дайн дууссанаас хойш 3–5 жилийн дотор Орос НАТО-гийн гишүүн улс руу халдах эрсдэл байгааг онцолж байна.
Эх сурвалж: AFP
