Америкийн бизнес эрхлэгч Илон Маск Apple болон OpenAI компаниудын эсрэг шүүхэд нэхэмжлэл гаргаснаа мэдэгдэв. Түүний эзэмшил дэх xAI компанийн нэхэмжлэлд дурдсанаар, ChatGPT бол iPhone-д суулгасан цорын ганц чатбот бөгөөд энэ нь хэрэглэгчдийг сонголтгүй болгож, бусад өрсөлдөгчдөд хаалт тавьж байна гэжээ.
Маскийн компани өөрийн боловсруулж буй Grok чатботыг өрсөлдөхүйц бүтээгдэхүүн болгох гэж байгаа ч ChatGPT аль хэдийн iPhone-д суусан тул хэрэглэгчидтэй хамтран ажиллах боломж нь хязгаарлагдсан гэж үзэж байна. Тиймээс xAI компани Apple, OpenAI-ээс олон тэрбум ам.долларын нөхөн олговор нэхэмжилжээ.
Нэхэмжлэлд дурдсанаар, АНУ-ын ухаалаг гар утасны 65 хувийг iPhone эзэлж, чатботын зах зээлийн 80 орчим хувийг ChatGPT дангаараа бүрдүүлж байгаа нь монополь байдалд хүргэсэн байна. Шинжээчид шүүх энэ асуудлыг монополь гэж хүлээн зөвшөөрч магадгүй ч Apple, OpenAI-ийн түншлэлийг бизнесийн ердийн шийдвэр гэж үзэх боломжтой хэмээн дүгнэжээ.
Apple ба OpenAI өнгөрсөн онд хамтран ажиллах гэрээ байгуулж, iOS 18 үйлдлийн системд Apple Intelligence-ийг нэвтрүүлсэн. Гэвч Apple компанийн зүгээс Маскийн нэхэмжлэлд тайлбар хийгээгүй бол Маск Х сүлжээндээ тэднийг монополийн эсрэг хуулийг зөрчиж байна гэж бичжээ.
OpenAI компанийн төлөөлөгч уг нэхэмжлэлийг Маскийн “бусдыг мөрдөн хавчиж байдаг” үйлдлийн нэг гэж тодорхойлсон бол захирал Сэм Альтман Маскийг өрсөлдөгчөө хохироохын тулд ийм арга хэрэглэдэг гэж шүүмжилсэн байна.
Маск, Альтман нар 2015 онд OpenAI-ийг хамтран байгуулсан ч 2018 онд санал зөрөлдсөний улмаас Маск компанийн ТУЗ-өөс гарснаас хойш хоёрын харилцаа хурцадмал хэвээр байгаа юм.
Эх сурвалж: DW
