/Yonhap/. Өмнөд Солонгосын “Korea Gas Corp” (KOGAS) компани 2028 оноос эхлэн арван жилийн хугацаанд АНУ-аас жил бүр 3.3 сая тонн шингэрүүлсэн хий нэмж худалдаж авахаар болсноо мэдэгдэв.

Гэрээ нь Ерөнхийлөгч Ли Жэ Мён, АНУ-ын Ерөнхийлөгч Дональд Трамп нарын анхны дээд хэмжээний уулзалтын дараа Вашингтонд болсон хоёр улсын бизнесийн дугуй ширээний уулзалтын үеэр байгуулсан юм. Худалдан авалтын гэрээг дэлхийн эрчим хүчний ханган нийлүүлэгчид, тэр дундаа “Trafigura” компанитай байгуулсан бөгөөд нийлүүлэлтийг АНУ-ын Техас болон бусад бүс нутаг дахь “Cheniere” фирмийн хийн төслүүдээс хийхээр тохирчээ.

Энэхүү хэлэлцээр нь өнгөрсөн сард Сөүл АНУ-ын бараанд ногдуулах татварын хувь хэмжээг 25-аас 15 хувь болгон бууруулсны хариуд дөрвөн жилийн хугацаанд 100 тэрбум ам.долларын өртөг бүхий Америкийн эрчим хүчний бүтээгдэхүүн худалдан авахаар амласан тохиролцооны хүрээнд хэрэгжиж буй юм.

KOGAS-ын тайлбарласнаар шинэ гэрээ нь Ойрх Дорнодод төвлөрсөн импортын эх үүсвэрийг төрөлжүүлж, хийн нийлүүлэлтийн тогтвортой байдлыг хангахад чухал алхам болж байна. Тус компани өмнө нь Катараас жилд 4.92 сая тонн хий авах гэрээгээ дуусгавар болгосон бол 2026 онд жил бүр 2.1 сая тонн хий худалдан авах гэрээ байгуулах төлөвлөгөөтэй байна.

KOGAS-ын гүйцэтгэх захирал Чой Ён Хэ “Шинэ гэрээний ачаар бид импортын эх үүсвэрээ төрөлжүүлж, үнийн өрсөлдөх чадварыг нэмэгдүүлэх боломж бүрдүүллээ” хэмээн онцолсон байна.

Эх сурвалж: Yonhap