Хятадын мэс заслын эмч нар гахайнаас хүнд уушги шилжүүлэн суулгах мэс заслыг амжилттай хийжээ. Одоогоор нэмэлт шинжилгээ хийх шаардлагатай байгаа боловч ийм мэс заслыг цаашид хийх боломж бий гэдгийг энэхүү үйл явдал харууллаа. 

Хятадын өмнөд нутгийн Гуанжоу хотын Амьсгалын замын өвчин судлалын төвийн судлаачдын мэдээлснээр, тархи нь үхэжсэн хүнд шилжүүлэн суулгасан гахайн уушги 216 цагийн турш /есөн хоног/ халдвар авалгүй, мөн суулгасан эрхтнийг бие организм хүлээж авахгүй байгаа шинж тэмдэг илрэхгүйгээр хэвийн ажилласан байна. Амьтны эрхтнүүдийг хүнд шилжүүлэн суулгахыг ксенотрансплантаци гэж нэрлэдэг бөгөөд үүнийг дэлхий дахинд нүүрлэж буй эрхтний хомсдолыг шийдвэрлэх боломжит шийдэл гэж үздэг.

Гуанжоугийн судалгаанд бичсэнээр, сүүлийн үед гахайнаас хүнд зүрх, бөөр шилжүүлэн суулгахад ахиц дэвшил гарсан боловч уушги нь “анатомийн болон физиологийн нарийн төвөгтэй” байдлаасаа шалтгаалан бэрхшээл үүсгэдэг байна. Түүнчлэн уушги нь гаднах агаартай шууд харьцдаг нь халдвар авах эрсдэлийг нэмэгдүүлдэг. Харин 22 сартай, 70 кг жинтэй Бама Шиан нэртэй эр гахайнаас 39 настай эрэгтэй өвчтөнд шилжүүлэн суулгасан генийн хувиргалттай уушги хэвийн ажиллаж байгаа бөгөөд долоо хоногийн туршид хяналт шинжилгээ хийсэн байна.

“Энэхүү судалгаа нь генийн хувьд хувиргасан гахайн уушги нь тархины үхжилтэй өвчтөнүүдэд бие организм хүлээн авахаас татгалзсан ноцтой шинж тэмдэг болон халдварын шинж тэмдэггүйгээр 216 цагийн турш ажиллах боломжтой болохыг харууллаа” гэж судлаачид дүгнэжээ. Эл амжилт нь генетикийн өөрчлөлт, дархлааг дарангуйлахад гарсан ахиц дэвшлийг онцлон харуулж байгаа боловч лабораторийн судалгааны үр дүнг эмнэлзүйн практикт нэвтрүүлэхэд шийдвэрлэх ёстой томоохон сорилтууд байгаа гэдгийг нотолсныг мөн дурдсан байна.