/Kyodo/. Японы “Фүкүшима” атомын цахилгаан станцын цацраг идэвхт бодисоос цэвэрлэсэн усыг далайд асгах ажиллагаа гурав дахь жилдээ үргэлжилж байна. Оператор компани “Tokyo Electric Power Company” (TEPCO)-ийн мэдээлснээр, наймдугаар сарын 7-ноос эхлэн 7900 орчим тонн усыг Номхон далайд асгаж, 14 дэх үе шатны ажлыг дуусгасан байна. Ингэснээр нийтдээ 110 мянга орчим тонн ус далайд асгаад байгаа ажээ.
Ажиллагааны үеэр авсан дээжинд далайн усны литр тутамд 61 беккерель тритий илэрсэн нь Японы аюулгүй байдлын 700 беккерелийн босго хэмжээнээс болон ДЭМБ-ын ундны усны 10 мянган беккерелийн хязгаараас нэлээд доогуур байгаа нь батлагдсан байна. Ирэх гуравдугаар сар хүртэлх санхүүгийн жилд нийт долоон ээлжээр 54 600 тонн ус далайд асгахаар төлөвлөжээ.
Фүкүшимагийн ослын дараа өдөрт 70 орчим тонн цацраг идэвхт бодис бүхий ус хуримтлагддаг байсан бөгөөд түүнийг цэвэрлэн саванд хадгалж ирсэн юм. Энэ ажиллагааг 2023 оны наймдугаар сарын 24-нөөс эхлүүлсэн ба 2051 он гэхэд бүрэн дуусгахаар төлөвлөж байна. Усыг далайд асгахын өмнө 40:1 харьцаагаар далайн усаар шингэлж байгаа юм.
Хятадын тал энэ оны зургаадугаар сард далайн ус болон далайн амьтдын дээжнээс хэвийн бус үзүүлэлт илрээгүй гэж мэдэгдэж, Японы далайн бүтээгдэхүүний импортын хоригоо цуцалсан боловч Фүкүшима болон бусад 10 мужийн бүтээгдэхүүнд хязгаарлалт хэвээр үйлчилж байна. Япон үлдсэн хоригийг ойрын хугацаанд цуцлуулахыг зорьж байгаа юм.
Эх сурвалж: Kyodo News
