Япон болон Өмнөд Солонгосын удирдагчид хоёр орны харилцааг ирээдүйд чиглэсэн, тогтвортой байдлаар хөгжүүлэх талаар Токиод уулзалт хийж тохиролцсон байна.

Японы Ерөнхий сайд Шигэрү Ишиба, Өмнөд Солонгосын Ерөнхийлөгч Ли Жэ Мён нар бямба гарагт хоёр цаг орчим уулзалт хийж, олон асуудлаар санал нэгдсэн байна. Энэ нь Ли Жэ Мён зургаадугаар сард үүрэгт ажилдаа орсноосоо хойш Японд хийж буй анхны айлчлал юм. Талууд Умард Солонгосыг цөмийн зэвсгээс ангижруулах үйл хэрэгт АНУ-тай хамтран ажиллахаа нотолж, төрөлт бууралт, гамшгийн эсрэг арга хэмжээ зэрэг нийгэм, эдийн засгийн нийтлэг сорилтуудыг хамтран шийдвэрлэх бүтэц байгуулахаар тохиролцжээ.

Ш.Ишиба өнгөрсөн засгийн газрын түүхэн байр суурийг баримтална гэдгээ илэрхийлээд, Өмнөд Солонгосын импортын хоригийн тухайд шинжлэх ухааны үндэслэлтэйгээр асуудлыг шийдвэрлэх хүсэлтэй байгаагаа онцолсон байна. Харилцааны шинэ шат эхэлснийг илтгэн, сүүлийн арван долоон жилд анх удаа хамтарсан хэвлэлийн мэдээ гаргаснаар хоёр орны харилцаа тогтворжиж буйн шинж гэж Японы тал дүгнэжээ. Удирдагчид харилцан айлчлалын хүрээнд “зуучлалын дипломат ажиллагаа”-г өргөжүүлж, эдийн засаг болон ард иргэдийн солилцоог нэмэгдүүлэх замаар хамтын ажиллагаагаа бэхжүүлэх зорилт дэвшүүлсэн байна.

Эх сурвалж: NHK