АНУ болон Европын Холбоо худалдааны гэрээний хүрээнд татварын шинэ тохиролцоонд хүрснээ пүрэв гарагт танилцууллаа. Уг тохиролцоогоор ЕХ-ноос нийлүүлэх бараа бүтээгдэхүүнд анх төлөвлөж байсан 30 хувийн татварыг 15 хувь болгон бууруулахаар болжээ. Үүний хариуд ЕХ нь Америкийн бүх аж үйлдвэрийн бүтээгдэхүүнд ногдуулж байсан татвараа цуцалж, Америкийн далайн гаралтай болон хөдөө аж ахуйн бүтээгдэхүүнд давуу эрх олгоно.
Эмийн импортын хувьд ЕХ-ноос оруулж ирэх эмийн бүтээгдэхүүнд 15 хувийн татвар ногдуулах бөгөөд нийтээр хэрэглэгддэг эм бэлдмэлүүд 2.5 хувийн татвартай үлдэхээр тусгагджээ. Энэ нь өмнө нь Д.Трампын мэдэгдэж байсан 250 хүртэлх хувийн татварын төлөвлөгөөнөөс эрс доогуур үзүүлэлт боллоо. Түүнчлэн Америкийн тал хагас дамжуулагчид болон согтууруулах ундаанд 15 хувийн татвар ногдуулах болсныг дурдсан байна.
Гэрээний хүрээнд Европын компаниуд гурван жилийн хугацаанд АНУ-аас 750 тэрбум ам.долларын эрчим хүчний бараа бүтээгдэхүүн, хиймэл оюун ухааны чипийг хамгийн багадаа 40 тэрбум ам.доллараар худалдан авахаар болжээ. Мөн стратегийн салбаруудад 600 тэрбум ам.долларын нэмэлт хөрөнгө оруулалт хийхээр төлөвлөсөн байна.
Хамтарсан мэдэгдэлд дурдсанаар, энэхүү тохиролцоо нь хоёр талын худалдаа, хөрөнгө оруулалтын харилцааг бататгаж, цаашид өргөжих эхний алхам болж буйг онцолсон байна.
Эх сурвалж: ABC
