Израилын Ерөнхий сайд Биньямин Нетаньяху Газын зурвасын дайныг зогсоох, барьцаанд байгаа бүх хүнийг суллах хэлэлцээнд оролцох чиглэл өгсөн талаар мэдэгдэв. Гэвч тэрбээр зөвхөн Израилын хувьд хүлээн зөвшөөрөхүйц нөхцөлүүдийн дор энэ алхамыг хийхийг онцоллоо.
Нетаньяху пүрэв гарагт цэргүүддээ хандан хэлэхдээ, олон улсын шахалт болон дотоод эсэргүүцлийг үл харгалзан засгийн газар Газын хойд хэсэгт байрлах Газа хот руу цохилт өгөх төлөвлөгөөг баталсан гэж мэдэгдсэн байна.
ХАМАС бүлэглэл Катар, Египетийн зуучилсан 60 хоногийн гал зогсоох саналыг хүлээн зөвшөөрч, барьцаалагдсан хүмүүсийн тал хувийг суллахаар тохирсон гэж Катарын тал мэдээлсэн. Гэвч Израилын эрх баригчид энэ хувилбарыг хүлээн зөвшөөрөхгүйгээ илэрхийлж, зөвхөн бүх хүнийг нэг дор сулласан нөхцөлд тохиролцоно гэдгээ давтан мэдэгдэв.
Израилын талын байр суурьт ХАМАС-ын зэвсгийг хураах, Газын бүсийг цэрэггүй болгох, бүс нутгийг Израилын хяналтад байлгах, мөн ХАМАС болон Палестины засаг захиргаанаас хамааралгүй шинэ засаглал тогтоох зэрэг шаардлагууд оржээ. Израилын мэдээлснээр барьцаалагдсан 50 хүнээс зөвхөн 20 нь амьд байгаа аж.
Эх сурвалж: BBC
