Израилын Батлан хамгаалах хүчин ХАМАС бүлэглэлийнхнийг буулган авах зорилгоор лхагва гарагт Газа хот руу шинэ дайралт эхлүүлснээ мэдэгдэв. Энэхүү ажиллагаа нь энгийн иргэдийг хохироож байгаа тул олон улсын хүчтэй шүүмжлэл дагуулж байна.
Армийн хэвлэлийн төлөөлөгч Эффи Дефриний мэдээлснээр, Газа хотын Зайтун дүүрэг болон ойролцоох Жабалиад хуурай замын довтолгоо өрнөж байгаа бөгөөд цэргийн хүчийг нэмэгдүүлж, “газар дээрх болон доорх” дэд бүтцийг устгах төлөвтэй байна. Тэрбээр “ХАМАС бүлэглэлийг цэргийн хүчнээс задран бутарсан партизаны отряд болгож чадсан” гэж онцлов.
Ерөнхий сайд Б.Нетаньяху энэ ажиллагааг “ХАМАС-ыг ялж, Газа хотыг эзлэх зорилготой” гэж тодорхойлжээ. Одоогийн байдлаар Израилын тал Газын зурвасын 75 орчим хувийг хяналтдаа авсан бөгөөд хотын төвийн ихэнх хэсэг олон удаагийн дайралтын улмаас балгас болсон байна.
Израилын Засгийн газар энэ долоо хоногийн сүүлээр хуралдаж төлөвлөгөөг батлах бөгөөд ойрын хугацаанд дахин 20 мянган цэрэг дайчлахаар бэлтгэж байгаа аж.
Газын эрүүл мэндийн албаны мэдээлснээр, өнгөрсөн 24 цагийн хугацаанд 58 хүн амь үрэгдэж, 185 хүн шархаджээ. Дайн эхэлснээс хойш нийт 62 122 хүн амь насаа алдаад байна. Үүнээс 266 нь өлсгөлөнгийн улмаас нас барсан бөгөөд тэдний 112 нь хүүхэд байжээ.
Эх сурвалж: Xinhua
