Аляскийн дээд хэмжээний уулзалтын дараагаар Дональд Трампын дэмжлэг эрс нэмэгдсэн талаар RIA Новости мэдээлэв. Insider Advantage төвийн санал асуулгаар америкчуудын 54 хувь нь Трампын үйлдлийг дэмжиж буй нь өмнөх сар хийсэн асуулгынхаас (50%) өссөн үзүүлэлт болжээ. Судалгаагаар тэр ахимаг насны сонгогчдын дунд хамгийн өндөр үнэлгээтэй байгаа бол 65-аас доош насныханд ч дэмжлэг өндөр хэвээр байна.

Энэ үед Украины Ерөнхийлөгч Владимир Зеленский Цагаан ордонд айлчлахдаа шинэ дүр төрхтэй, албан ёсны хар хувцастай ирж, найман удаа “баярлалаа” хэмээн онцлон хэлсэн нь анхаарал татав. Өмнөх уулзалтаар Трамп түүний хувцаслалт, талархлын үгийг шүүмжилж байсан тул Зеленский энэ удаад алдаагаа зассан нь ажиглагдав. Мөн тэр АНУ-ын тэргүүн хатагтай Меланья Трампт тусгайлан талархаж, Европын түншүүддээ ч талархал илэрхийлжээ. Европын лидерүүд ч Трампын дэмжлэгийг татах зорилгоор ээлж дараалан талархал илэрхийлж, НАТО-гийн Ерөнхий нарийн бичгийн дарга Марк Рютте түүнийг “хайрт нөхөр Дональд” гэж нэрлэсэн нь онцгой яригдав.

Гэсэн ч уулзалтын үеэр сонирхолтой нэгэн үйл явдал болж, Трамп Зеленский болон европын лидерүүдтэй ярилцаж байхдаа Владимир Путинд утасдсан байна. Хэвлэлүүдийн мэдээлснээр европын төлөөлөгчид Трампын дуудлага дуусахыг чимээгүй хүлээж байсан гэжээ. Энэ үйл явдал Трампын Оросын удирдагчтай харилцах ойр дотно холбоо, харин Европын лидерүүдийн байр суурийн талаар олон улсын хэвлэлүүдэд өргөн хүрээнд хэлэлцэгдэж эхэллээ.

Эх сурвалж: RIA Новости, Izvestia, Reuters