Энэтхэгийн Ерөнхий сайд Нарендра Моди мягмар гарагт БНХАУ-ын Гадаад хэргийн сайд Ван Итэй уулзахдаа хоёр улсын харилцаанд сүүлийн жилд тогтвортой ахиц гарсныг онцолж, бие биеийнхээ ашиг сонирхлыг хүндэтгэж буйг сайшаалаа. Тэрбээр Казань хотод Ши Жиньпинтэй уулзсанаас хойш харилцаа нааштайгаар өөрчлөгдөж буйг X сүлжээндээ тэмдэглэжээ.
Н.Моди наймдугаар сарын 31-нд Тяньжин хотноо эхлэх Шанхайн хамтын ажиллагааны байгууллагын /ШХАБ/ дээд хэмжээний уулзалтад оролцох бөгөөд энэ нь түүний сүүлийн долоон жилд Хятадад хийх анхны айлчлал болох юм. Харин Ван И “Энэтхэг-Хятадын харилцаа эрүүл, тогтвортой байх нь хоёр улсын язгуур ашиг сонирхолд нийцэж байна” хэмээн онцлов.
Дэлхийн хамгийн олон хүн амтай хоёр гүрний харилцаа 2020 онд хил дээр гарсан мөргөлдөөнөөс хойш хурцадмал байсан. Тухайн үед Энэтхэгийн 20, Хятадын 4 цэрэг амиа алдсанаар улс төрийн харилцаа олон жил тасалджээ. Харин өнгөрсөн аравдугаар сард ОХУ-д болсон уулзалтын үеэр Н.Моди, Ши Жиньпин нар албан ёсоор хэлэлцээ хийснээр харилцаа сэргэж эхэлсэн байна.
Энэ жил хоёр тал албан ёсны айлчлалын тоог нэмэгдүүлж, худалдааны хязгаарлалтыг багасгах, иргэдийн шилжилт хөдөлгөөний асуудлыг хөнгөвчлөх талаар ярилцаж буй. Энэтхэгийн Гадаад хэргийн яамны мэдээлснээр хоёр улс 3488 км хилийн дагуух гурван бүсээр худалдааг дахин эхлүүлэхээр хэлэлцэж байгаа аж.
Эх сурвалж: DW
