Цаг уур, орчны шинжилгээний газраас мэдээлснээр өнөөдөр буюу наймдугаар сарын 20-нд Улаанбаатар хот, Төв, Сэлэнгэ, Дархан-Уул аймаг болон Дундговийн хойд хэсгээр ахиухан хэмжээний усархаг бороо орно. Малчид, хадланчид болон иргэдийг болзошгүй нөөлөг салхи, аянга цахилгаан, мөндөр, үерийн аюулаас сэрэмжтэй байхыг онцгойлон анхаарууллаа.
20-ны өдөр Төв, Орхон, Сэлэнгэ, Дархан-Уул, Дундговийн нутгаар, мөн шөнөдөө Төв аймгийн зүүн хэсэг, Дорноговь, Говьсүмбэр, Хэнтий, Дорнод, Сүхбаатарын нутгаар үргэлжилсэн бороо орно. Цаг агаарын урьдчилсан төлөвөөр баруун аймгуудын зарим газар, төв болон говийн аймгуудын ихэнх нутаг, зүүн нутгийн баруун хэсгээр дуу цахилгаантай аадар бороо, мөндөр орж, салхи түр зуур ширүүсэх ажээ.
Улаанбаатар хот орчмоор 18-20 хэм, Багануурт 17-19 хэм, Тэрэлжид 15-17 хэм дулаан байх төлөвтэй байна.
Наймдугаар сарын 21-25-нд төв, зүүн болон говийн аймгуудын нутгаар үргэлжилсэн болон түр зуурын аадар бороо үргэлжилж, салхи ширүүсэх төлөвтэй байна. Алтай, Хангай, Хөвсгөл, Хэнтийн уулархаг бүсэд шөнөдөө 1 хэмийн хүйтнээс 4 хэмийн дулаан, өдөртөө 13-18 хэмийн дулаан байх бол говийн өмнөд хэсгээр өдөртөө 23-28 хэм хүрч хална. Бусад нутгаар шөнөдөө 6-11 хэм, өдөртөө 16-21 хэмийн дулаан тогтох урьдчилсан тооцоо гарчээ.
Эх сурвалж: Цаг уур, орчны шинжилгээний газар
