Цаг уурын байгууллагаас өнөөдөр /2025.08.20/ Улаанбаатар хот болон Төв, Сэлэнгэ, Дархан-Уул аймаг, Дундговийн хойд хэсгээр ахиухан хэмжээний усархаг бороо орохыг сэрэмжлүүллээ. Энэ нь үерийн аюултай нөхцөл үүсгэж болзошгүй тул Онцгой байдлын ерөнхий газрын Ажиллагааны Шуурхай штабаас төв, орон нутгийн шуурхай штабтай цахим хурал хийж, шаардлагатай үүрэг чиглэл, аргазүйн зөвлөмжийг өгсөн байна.

Хурлын дагуу дараах арга хэмжээг хэрэгжүүлж эхэлжээ. Үүнд: үерийн аюултай бүс нутагт иргэдэд сэрэмжлүүлэг, мэдээлэл хүргэх, хашаа байшин руу ус орох эрсдэлтэй газрыг тогтоон түр хамгаалалт хийх, суваг шуудууг цэвэрлэх ажлыг зохион байгуулах, мөн шуурхай штаб, алба хаагчид өндөржүүлсэн бэлэн байдалд ажиллах зэрэг багтаж байна. Түүнчлэн үерийн үед ашиглах техник хэрэгслийн бэлэн байдлыг хангаж, шаардлагатай тохиолдолд шуурхай ажиллах нөхцөлийг бүрдүүлжээ.

Иргэдийг хамгаалалтын арга хэмжээг цаг тухайд нь авч, сэрэмжтэй байхыг Онцгой байдлын байгууллагаас дахин онцгойлон анхааруулж байна.

Эх сурвалж: ОБЕГ