Улаанбаатар хотноо ирэх оны наймдугаар сарын 17-28-нд зохион байгуулах НҮБ-ын Цөлжилттэй тэмцэх конвенцын Талуудын 17 дугаар бага хурлын (COP17) албан ёсны логог Монгол Улс болон тус конвенцын Нарийн бичгийн дарга нарын газар хамтран баталлаа.

Лого нь эв нэгдэл, харилцан итгэлцлийн үрийг хамтдаа тарьж, доройтсон газрыг сэргээхийн төлөө хамтран ажиллахыг уриалж буй санааг илэрхийлжээ. Дүрслэлийн дээд хэсэгт нарны туяа мэт цацарсан дугуй хэлбэр нь монголын уламжлалт тэнгэр шүтлэг, мөнх хөх огторгуйг бэлгэдсэн бол төв хэсэгт монгол гэрийн тооны дүрслэл нь хүн ба байгальтайгаа зохицон амьдрах ухааныг харуулсан байна. Доод хэсэгт гарын алганд нахиалж буй соёо нь дэлхийн тэсвэртэй, шинэчлэгдэж буйг бэлгэдсэнээр байгальд энэрэнгүй хандах, хамгаалах, хариуцлагын үзлийг илэрхийлж байна.

Монгол Улсын газар нутгийн 75 орчим хувь нь хөрсний доройтолд өртсөн тул “Тэрбум мод”, “Цагаан алт”, “Хүнсний хувьсгал” зэрэг үндэсний хөдөлгөөнүүдээр дамжуулан хөрс, хөдөө аж ахуйг сэргээх ажлыг тэргүүлэх чиглэл болгожээ. COP17 бага хурлыг зохион байгуулснаар Монгол Улс дэлхий дахинаа туршлага солилцох, уур амьсгалын өөрчлөлт, биологийн олон янз байдлын хомсдол зэрэг харилцан уялдаатай сорилтуудыг хамтын хүчээр даван туулахад чухал хувь нэмэр оруулах юм.

Хуралд НҮБ-ын 197 улсын төлөөлөгчид, эрдэмтэн судлаачид, иргэний нийгмийн болон хувийн хэвшлийн төлөөлөл оролцож, ган гачигт тэсвэртэй байдал, газар хөрс сэргээх зорилтыг ахиулахын зэрэгцээ Монголын санаачилсан “Бэлчээр ба нүүдлийн мал аж ахуй эрхлэгчдийн олон улсын жил”-ийн хүрээнд бэлчээрийн тогтвортой менежментийн ач холбогдлыг онцлон хэлэлцэнэ.