Цаг уур, орчны шинжилгээний газраас мэдээлснээр 2025 оны наймдугаар сарын 20-нд буюу маргааш өглөөнөөс орой, шөнө хүртэл Улаанбаатар хот болон орчмоор усархаг, ахиухан хэмжээний бороо орох төлөвтэй байна.
Иймд Нийслэлийн Онцгой байдлын газраас иргэдэд сэрэмжлүүлэг хүргэж, үерийн аюултай бүсээс хол, аюулгүй газарт байрлахыг зөвлөж байна. Түүнчлэн орон сууцны граж, В1 давхар руу ус нэвтрэхээс урьдчилан сэргийлэх хамгаалалт хийх, худгаа хамгаалах далан, шуудуу, хашлага татах шаардлагатайг онцоллоо.
Мөн хүүхдийг гол, нуур, тогтоол ус, цөөрмийн ойролцоо тоглуулахгүй байх, амралт, зугаалгаар явахдаа уулын ам, голын ай сав, үерийн буулт бүхий газарт отоглож хоноглохгүй байхыг анхааруулсан. Зөвхөн баталгаат зам, гүүрээр зорчих нь үерийн үед эрсдэлээс хамгаалах чухал нөхцөл болохыг тус байгууллага санууллаа.
Эх сурвалж: Цаг уур, орчны шинжилгээний газар, Нийслэлийн Онцгой байдлын газар
