Газын зурваст 22 сар гаруй үргэлжилж буй мөргөлдөөнийг зогсоохын тулд Египет, Катарын зуучлалтайгаар боловсруулсан шинэ гал зогсоох саналыг ХАМАС бүлэглэл хүлээн авснаа мэдэгдлээ. Бүлэглэлийн дээд албан тушаалтан Бассем Наим “Бид зуучлагчдын шинэ саналыг ямар нэгэн нэмэлт өөрчлөлтгүйгээр зөвшөөрч, хариугаа хүргүүлсэн. Дайны галыг унтраахыг хүсэн залбирч байна” гэж мэдэгдсэн байна.
Энэхүү саналыг Израилын талд албан ёсоор дамжуулсан бөгөөд зуучлагчид “бөмбөг одоо Израилын талд байна” гэж тодотгожээ. Израилын хариу одоогоор тодорхойгүй байгаа ч Палестины эх сурвалжууд хэлэлцээг дахин эхлүүлэх огноог зарлахыг хүлээж буйгаа илэрхийлсэн байна.
Египетийн төрийн хэвлэл мэдээллийн хэрэгслээр мэдээлснээр эхний ээлжинд 60 хоногийн хугацаанд түр эвлэрэл хийх, барьцааны хүмүүсийг хэсэгчлэн суллах, зарим палестин хоригдлыг суллах, мөн хүмүүнлэгийн тусламжийг нэвтрүүлэхийг санал болгожээ.
Энэ бүхний зэрэгцээ Израилын онц байдлын Засгийн газар саяхан Газа хот болон ойр орчмын дүрвэгсдийн хуаранг эзлэх төлөвлөгөөг баталсан нь олон улсын түвшинд төдийгүй дотооддоо хүчтэй эсэргүүцэл дагуулсан билээ. Ийм нөхцөлд ХАМАС-ын шийдвэр нь гал зогсоох хэлэлцээний шинэ боломжийг нээж байгаа гэж ажиглагчид үзэж байна.
Эх сурвалж: AFP
