АНУ-ын Төрийн департамент хууль тогтоомж зөрчсөн болон хугацаа хэтрүүлсэн зэрэг үндэслэлээр 6000 гаруй гадаад оюутны визийг хүчингүй болгосон талаар BBC-д мэдээлжээ. Үүнээс 4000 орчим оюутны визийг согтуугаар жолоо барих, танхайрах, хулгай хийх зэрэг хууль зөрчсөн үйлдлүүдийн улмаас цуцалсан бол 200-300 хүнийхийг “терроризмыг дэмжсэн” гэх үндэслэлээр хүчингүй болгосон байна.
Төрийн департамент “терроризмыг дэмжсэн” гэдэг ойлголтыг тодорхой тайлбарлаагүй ч, Палестиныг дэмжиж жагсаал хийсэн зарим оюутныг еврейн эсрэг үйлдэл хийсэн гэж үзэн визийг нь цуцалжээ. Энэ нь Ерөнхийлөгч Дональд Трампын засаг захиргааны үед цагаачид болон гадаадын оюутнуудад чиглэсэн хатуу бодлогын нэг хэсэг болж байна.
Мөн АНУ визийн ярилцлагын товыг түр зогсоож байгаад зургаадугаар сараас сэргээхдээ өргөдөл гаргагч бүрээс нийгмийн сүлжээний хаягаа нээлттэй болгохыг шаардсан. Энэ нь Америкийн нийгэм, соёл, төрийн байгууллагад дайсагнасан шинж тэмдэг илэрч буй эсэхийг шалгах зорилготой гэж тайлбарлажээ.
2023-2024 оны хичээлийн жилд дэлхийн 210 гаруй орны 1.1 сая оюутан АНУ-ын коллеж, их дээд сургуульд суралцаж байгаа бөгөөд оюутны визийг цуцлах шийдвэр нь тэдний дунд үл итгэлцлийг төрүүлж, Ардчилсан намын зүгээс хүчтэй эсэргүүцэлтэй тулгарч байна.
Эх сурвалж: BBC
