АНУ, Украин болон Европын удирдагчдын Вашингтонд хийсэн уулзалтын үеэр Украины Ерөнхийлөгч В.Зеленский шинэ санал дэвшүүлжээ. Түүний хэлснээр, хэрэв АНУ-аас Украинд аюулгүй байдлын баталгаа олговол Европын орнуудаас олгох санхүүжилтээр 100 тэрбум долларын зэвсэг АНУ-аас худалдан авахаар төлөвлөж байна. Энэ тухай “Файнэншл Таймс” сонин баримт бичгээс эш татан мэдээлсэн байна.

Мөн саналд Украины компаниудтай хамтран дрон үйлдвэрлэх 50 тэрбум долларын гэрээг багтаасан бөгөөд гэрээний дүнгийн яг хэдэн хувь нь худалдан авалт, хэд нь хөрөнгө оруулалт болохыг тодорхой заагаагүй байна. Гэсэн ч Украины тал хамгийн багадаа 10 нэгж “Пэтриот” агаарын довтолгооноос хамгаалах систем авах хүсэлтэй байгаагаа илэрхийлжээ.

Уулзалтын үеэр АНУ-тай уялдуулан Украинд аюулгүй байдлын баталгаа олгох асуудлыг мөн хэлэлцсэн байна. Зеленскийн мэдэгдсэнээр, ойрын 7-10 хоногт баталгааны баримт бичгийг боловсруулж бэлэн болгох төлөвтэй байгаа аж. Тус баталгаа нь гурван чиглэлд төвлөрөх бөгөөд тэдгээр нь Украин армийн зэвсэглэл, холбоотнуудын үүрэг, Украины цэргийн аж үйлдвэрийн хөгжил юм. Гэхдээ гадаадын цэргийг байрлуулах эсэх зэрэг нарийн асуудлыг хэлэлцэхэд эрт байгааг тэрээр онцолжээ.

Хамгийн сүүлийн мэдээллээр, АНУ-ын Ерөнхийлөгч Д.Трамп Оросын Ерөнхийлөгч В.Путинтэй ярилцсаны дараа Путин, Зеленский нарын уулзалтыг зохион байгуулахаар бэлтгэл эхэлжээ. Үүнийг хэрэгжүүлэх ажлыг дэд ерөнхийлөгч Жеймс Дэвид Вэнс, төрийн нарийн бичгийн дарга М.Рубио, тусгай элч С.Уиткофф нарт даалгасан байна.

Эх сурвалж: DW