Боливид болсон ерөнхийлөгчийн сонгуулийн үр дүн хоёр дахь шатны санал хураалт зайлшгүй болох төлөвийг харуулж байна. Сонгогчдын саналаа өгсний дараа хийгдсэн санал асуулгын дүнгээр эрх баригч социалистууд сүүлийн хорь шахам жилийн хамгийн томоохон ялагдлын ирмэг дээр иржээ.

Ipsos болон Captura байгууллагуудын мэдээлснээр төвч үзэлт сенатч Родриго Паз нийт саналын 32 орчим хувийг авч нэгдүгээрт бичигдсэн бол барууны үзэл баримтлалтай ерөнхийлөгч асан Хорхе “Туто” Куирога 26 хувийн саналтай хоёрдугаарт жагсжээ. Харин бизнесийн магнат Самуэл Дориа Медина гуравдугаарт орсон байна. Эрх баригч “Социализмын төлөөх хөдөлгөөн” намын нэр дэвшигч Едуардо дель Кастило ердөө гурван хувийн дэмжлэг авсан нь тус намын олон жилийн ноёрхол суларсныг илтгэв.

Боливийн хуульд зааснаар ерөнхийлөгчийн сонгуульд шууд ялалт байгуулахын тулд нэр дэвшигч нийт саналын тавин хувиас дээш авах эсвэл дөчин хувиас дээш авч, араас нь орсон өрсөлдөгчөөс арван хувийн илүү санал авах ёстой. Энэ нөхцөл биелэхгүй бол санал хураалтын хоёр дахь шат аравдугаар сарын 19-нд болох бөгөөд тус улсын улс төрийн түүхэнд шинэ хуудас нээх үйл явдал болох юм.

Энэхүү сонгууль эдийн засгийн хүндрэлийн үед болж буйгаараа онцлог бөгөөд социалистуудын лидер асан Эво Моралес нэр дэвших эрхгүй болсон нь улс төрийн өрсөлдөөнийг улам хурцатгасан. Тэрбээр шийдвэрийг эсэргүүцэн сонгогчдыг хоосон санал өгөхийг уриалжээ.

Эх сурвалж: DW