АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин нар наймдугаар сарын 16-нд Аляскийн Анкориж хотод уулзаж, Украинд энх тайван тогтоох боломжийн талаар ярилцжээ. Элмендорф-Ричардсон цэргийн баазад болсон уулзалт бараг гурван цаг үргэлжилсэн нь тэдний өмнөх уулзалтуудаас хамгийн урт хугацааны ярилцлага байлаа.
Путин хэлэхдээ хоёр талын яриа бүтээлч, харилцан хүндэтгэлтэй нөхцөлд болж, Украин дахь сөргөлдөөнийг зогсоох чиглэлд тодорхой ойртсон гэдгийг онцолсон байна. Мөн Украины аюулгүй байдлыг хангах талаар ч хэлэлцсэнээ дурдав. Харин Трамп уулзалтыг “10 онооны үнэлгээгээр арав” гэж нэрлэж, хоёр орны харилцаанд мэдэгдэхүйц дэвшил гарлаа гэв.
Талууд Орос-Америкийн харилцааг хэвийн болгох, хориг арга хэмжээг зөөлрүүлэх, Арктикт хамтран ажиллах болон шууд нислэгийг сэргээх асуудлыг ч хөндсөн байна. Хэдийгээр тодорхой гэрээ хэлэлцээр байгуулж амжаагүй ч цаашид дээд түвшний уулзалтууд үргэлжлэхээр төлөвлөж байгаа бөгөөд Путин Трампыг Москвад айлчлахыг урьсан байна.
Олон улсын хэвлэл мэдээллийн хэрэгслүүд уулзалтыг янз бүрээр үнэлжээ. Зарим нь Путины ялалт гэж дүгнэсэн бол нөгөө хэсэг нь тодорхой “эвлэрэл”, “гал зогсоох” гэсэн үгс сонсогдоогүйг онцлов. Гэсэн ч хоёр орны лидерүүд Украинд энх тайван тогтоох сонирхлоо илэрхийлсэн нь өөрөө чухал дохио гэж шинжээчид үзэж байна.
Эх сурвалж: Izvestia, РИА Новости, REUTERS, Politico, The New York Times
